വണ്ടൂർ (മലപ്പുറം): ബൈക്കിന്റെ  കാർബറേറ്ററുമായി ബന്ധപ്പെട്ട പണമിടപാടിനെച്ചൊല്ലിയുണ്ടായ തർക്കത്തിൽ ​​ക്രൂരമർദനമേറ്റ് യുവാവ് മരിച്ച കേസിൽ പ്രതികളെ റിമാൻഡ്​ ചെയ്തു. പോരൂർ ചാത്തങ്ങോട്ടുപുറം വേലാപറമ്പൻ ശിവപ്രസാദിന്റെ  മകൻ വിഷ്ണുവാണ്​ (23) മരിച്ചത്. പിടിയിലായ ചാരങ്കാവ് കോളനിയിലെ മേലേകളത്തിൽ രൂപേഷ് (24), വിഷ്ണു (22), പന്നിക്കോട് ഷൈജു (27), അക്കരമേൽ രാജേഷ് (27) മഠത്തൊടി സുധീഷ് എന്ന മണി (24), പാലാതൊടി ദേവദാസൻ (24) എന്നിവരെയാണ് പെരിന്തൽമണ്ണ കോടതി റിമാൻഡ്​ ചെയ്തത്.

പ്രതികളെ കസ്​റ്റഡിയിൽ വാങ്ങുമെന്ന് പൊലീസ് അറിയിച്ചു. വിഷ്ണുവിന്റെ  സഹോദരൻ ജിഷ്ണു വർക്ക് ഷോപ്പ് ജീവനക്കാരനാണ്. അവിടെ ജോലി ചെയ്യുകയായിരുന്ന പ്രതി രൂപേഷ് ബൈക്കിന്റെ  കാർബറേറ്റർ ജിഷ്ണുവിന് നൽകിയിരുന്നു. ഇതിന്റെ  പണം രൂപേഷ് വിഷ്ണുവിന്റെ  വീട്ടിലെത്തി അമ്മയിൽ നിന്ന്​ വാങ്ങി. എന്നാൽ, പണം നേരത്തെ രൂപേഷിന് ജിഷ്​ണു നൽകിയിരുന്നു.

ഈ തുക രൂപേഷിനെ കണ്ടപ്പോൾ പിതാവ്​ ശിവപ്രസാദും വിഷ്ണുവും തിരിച്ചുചോദിച്ചു. ഇതോടെ രൂപേഷ് സുഹൃത്തുക്കളുമായി വന്ന്​​​ മർദിക്കുകയായിരുന്നു. കല്ല്​ കൊണ്ടുള്ള അടിയിൽ വിഷ്ണുവിന്റെ തലക്കും നെഞ്ചിലും പരിക്കേറ്റു. ആദ്യം മഞ്ചേരി മെഡിക്കൽ കോളജ് ആശുപത്രിയിൽ എത്തിച്ചു. പിന്നീട് കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റി. അവിടെ എത്തുമ്പോൾ അബോധാവസ്ഥയിലായിരുന്നു. രണ്ട്​ ദിവസം അബോധാവസ്​ഥയിൽ കഴിഞ്ഞശേഷമാണ്​ മരണത്തിന്​ കീഴടങ്ങിയത്​.

വിഷ്ണുവിന്റെ മൃതദേഹം സംസ്കരിച്ചത് സ്വന്തമായൊരു വീട് നിർമിക്കാൻ വാങ്ങിയ സ്ഥലത്താണ്​. ഇവിടെ ഒരു വീട് എന്ന സ്വപ്നം സഫലമാകാതെയാണ്​ വിഷ്​ണു യാത്രയായത്​. 20 വർഷം മുമ്പ്​ ഇടുക്കി വടക്കേ മലയിൽനിന്ന്​ ടാപ്പിങ്​ ജോലിക്ക് ജില്ലയിലെത്തിയതാണ് വിഷ്ണുവിന്റെ മാതാപിതാക്കളായ ശിവപ്രസാദും സിനിയും. നേരത്തെ എളങ്കൂർ ചാരങ്കാവിലാണ് താമസിച്ചിരുന്നത്. കൂലിയിൽനിന്ന്​ മിച്ചം പിടിച്ചാണ് ഇവിടെ ആറ്​ സെൻറ് സ്ഥലം വാങ്ങിയത്. ഇതാണ് കുടുംബത്തിന്റെ ആകെയുള്ള സമ്പാദ്യം. അച്ഛനും അമ്മക്കുമൊപ്പം വിഷ്ണുവും ടാപ്പിങ്ങിന്​ പോയിരുന്നു. സാമ്പത്തികപ്രയാസം അനുഭവിച്ചിരുന്ന കുടുംബം രണ്ടുവർഷം മുമ്പാണ് ചാത്തങ്ങോട്ടുപുറം താലപ്പൊലി പറമ്പിലെ വാടക വീട്ടിലേക്ക് താമസം മാറ്റിയത്. ചാരങ്കാവിൽ താമസിക്കുമ്പോൾ അടുത്ത പരിചയമുണ്ടായിരുന്നവരാണ് വിഷ്ണുവിനെ മർദിച്ച സംഘത്തിലുള്ളത്.