ദുബൈ: കോവിഡിന്റെ  വകഭേദമായ ഒമിക്രോൺ വ്യാപകമായതോടെ വിവിധ രാജ്യങ്ങൾ യാത്രാനടപടികൾ വീണ്ടും കർശനമാക്കുകയാണ്​. ഇതി​നിടെയാണ്​ വിദേശത്തുനിന്നെത്തുന്നവർക്ക്​ കേരളത്തിൽ ഏഴ്​ ദിവസത്തെ ക്വാറൻറീൻ നിർബന്ധമാക്കി എന്ന വാർത്ത പരന്നത്​. ഇതോടെ പ്രവാസികൾ ആശയക്കുഴപ്പത്തിലായി.

യഥാർത്ഥത്തിൽ ആർക്കാണ്​ ഏഴ്​ ദിവസത്തെ നിർബന്ധിത ക്വാറൻറീൻ ?.

കഴിഞ്ഞ വർഷം സർക്കാർ പുറത്തിറക്കിയ നിർദേശം അനുസരിച്ച്​ എല്ലാവർക്കും ഏഴ്​ ദിവസത്തെ ക്വാറൻറീൻ നിർബന്ധമാണ്​. ഈ നിർദേശം ഇപ്പോഴും നിലവിലുണ്ട്​. ഇത്​ കർശനമാക്കുമെന്നാണ്​ സംസ്​ഥാന ആരോഗ്യ വകുപ്പ്​ അറിയിച്ചിരിക്കുന്നത്​. ഒമിക്രോൺ റിപ്പോർട്ട്​ ചെയ്യപ്പെട്ട രാജ്യങ്ങളിൽ നിന്ന്​ വരുന്നവർക്കാണ്​ ഈ കർശന നിരീക്ഷണം. നിലവിൽ ഗൾഫ്​ രാജ്യങ്ങളിൽ ഇതുവരെ ഒമിക്രോൺ റിപ്പോർട്ട്​ ചെയ്​തിട്ടില്ല. അതിനാൽ, ഗൾഫിൽ നിന്നെത്തുന്നവർക്ക്​ ഏഴ്​ ദിവസത്തെ ക്വാറൻറീൻ വീണ്ടും കർശനമാക്കില്ലെന്നാണ്​ അറിയുന്നത്​.

കേരളത്തിൽ ഏഴ്​ ദിവസം ക്വാറൻറീൻ നിർബന്ധമാണെങ്കിലും നാട്ടിലെത്തുന്ന പ്രവാസികൾ ക്വാറൻറീനിൽ കഴിയാറില്ല. ഗൾഫ്​ രാജ്യങ്ങളിൽ കോവിഡ്​ കുറഞ്ഞതും വാക്​സിനേഷനെടുത്തതുമാണ്​ കാരണം. മാത്രമല്ല, ഗൾഫിൽ നിന്ന്​ കോവിഡ്​ പരിശോധന ഫലവുമായി എത്തുന്ന ഇവർക്ക്​ വിമാനത്താവളങ്ങളിലും പരിശോധന നടത്തുന്നുണ്ട്​. രണ്ട്​ പരിശോധന കഴിഞ്ഞെത്തുന്നതിനാലാണ്​ പ്രവാസികൾക്ക്​ ക്വാറൻറീൻ ഒഴിവാക്കുന്നത്​.