കൂത്തുപറമ്പ്‌ : പോരാട്ടത്തിന്റെ തീപിടിപ്പിക്കുന്ന ഓർമയുമായി വീണ്ടുമൊരു നവംബർ 25. വെടിയുണ്ടകളും സമരശക്തിയും മുഖാമുഖംനിന്ന കൂത്തുപറമ്പ്‌ പോരാട്ടത്തിനും രക്തസാക്ഷിത്വത്തിനും 27 വർഷം. രക്തസാക്ഷികൾ കെ.കെ. രാജീവൻ, കെ.വി. റോഷൻ, കെ. ഷിബുലാൽ, സി. ബാബു, കെ. മധു എന്നിവരുടെ മഹാത്യാഗത്തിന്റെ ധീരസ്‌മരണ വ്യാഴാഴ്‌ച കേരളം പുതുക്കും. സമാനതയില്ലാത്ത യുവജനപോരാട്ടത്തിന്റെ ഓർമ പുതുക്കി ഡി.വൈ.എഫ്‌.ഐ നേതൃത്വത്തിൽ അനുസ്‌മരണ യോഗവും പുഷ്‌പാർച്ചനയും പ്രകടനവും ദീപശിഖാ റിലേയുമുണ്ടാകും.

സമരഭൂമിയായ കൂത്തുപറമ്പിൽ രക്തസാക്ഷിദിനറാലി ഡി.വൈ.എഫ്‌.ഐ അഖിലേന്ത്യാപ്രസിഡന്റ്‌ എ.എ. റഹീം ഉദ്‌ഘാടനംചെയ്യും. രാവിലെ ഏഴിന്‌ രക്തസാക്ഷി സ്‌തൂപത്തിൽ കേന്ദ്രകമ്മിറ്റി അംഗം വി.കെ. സനോജ്‌ പതാക ഉയർത്തും. രക്തസാക്ഷികൾ വെടിയേറ്റുവീണ സ്ഥലങ്ങളിൽനിന്ന്‌ ബന്ധുക്കളും നേതാക്കളും വൈകിട്ട്‌ 3.30ന്‌ ദീപശിഖ കൊളുത്തി നൽകും. തൊക്കിലങ്ങാടി കേന്ദ്രീകരിച്ച്‌ യുവജനപ്രകടനവുമുണ്ടാകും.

രക്തസാക്ഷി മധുവിന്റെ നാടായ കോടിയേരി കല്ലിൽതാഴെയും, ബാബുവിന്റെ നാടായ പൊന്ന്യം കുണ്ടുചിറയിലും വ്യാഴാഴ്‌ച വൈകിട്ട്‌ പ്രകടനവും പുഷ്‌പാർച്ചനയും അനുസ്‌മരണയോഗവും നടക്കും. കല്ലിൽതാഴെ മന്ത്രി പി.എ. മുഹമ്മദ്‌റിയാസും, കുണ്ടുചിറയിൽ സി.പി.എം സംസ്ഥാനകമ്മിറ്റി അംഗം എം. സ്വരാജും അനുസ്‌മരണയോഗം ഉദ്‌ഘാടനംചെയ്യും. ചമ്പാട്‌ അരയാക്കൂലിലെ ഷിബുലാൽ സ്‌മൃതിമണ്ഡപത്തിൽ രാവിലെ ഏഴിനാണ്‌ പുഷ്‌പാർച്ചനയും അനുസ്‌മരണയോഗവും, പാനൂരിലെ കെ.കെ. രാജീവൻ ബലികുടീരത്തിൽ വൈകിട്ട്‌ പുഷ്‌പാർച്ചനയും പാനൂർ രാജുമാസ്‌റ്റർ സ്‌മാരകമന്ദിരം കേന്ദ്രീകരിച്ച്‌ യുവജന പ്രകടനവും. നടക്കും
കെ.വി. റോഷൻ ദിനാചരണത്തിന്റെ ഭാഗമായി എസ്.എഫ്.ഐ ജില്ലാ കമ്മിറ്റി സംഘടിപ്പിച്ച അനുസ്മരണ യോഗം മാറോളിഘട്ട് ടൗൺ സ്ക്വയറിൽ സംസ്ഥാന വൈസ് പ്രസിഡന്റ്‌ എം.എസ്. ശരത്ത് ഉദ്ഘാടനം ചെയ്തു.
വിദ്യാഭ്യാസ കച്ചവടത്തിനും സഹകരണ മേഖലയിലെ അഴിമതിക്കുമെതിരെ 1994 നവംബർ 25ന്‌ ഡി.വൈ.എഫ്‌.ഐ നേതൃത്വത്തിൽ കൂത്തുപറമ്പിൽ സമാധാനപരമായി നടന്ന സമരത്തിനുനേരെയാണ്‌ പൊലീസ്‌ നിറയൊഴിച്ചത്‌. അഞ്ചുപേർ കൊല്ലപ്പെടുകയും ചൊക്ലി മേനപ്രത്തെ പുതുക്കുടി പുഷ്‌പൻ ശരീരം തളർന്ന്‌ കിടപ്പിലാവുകയും ചെയ്‌തു. വെടിവയ്‌പിലും ലാത്തിച്ചാർജിലും നൂറുകണക്കിന്‌ യുവാക്കൾക്ക്‌ പരിക്കേറ്റു.