തിരുവനന്തപുരം: അഭ്യസ്തവിദ്യരായ 20 ലക്ഷം തൊഴിൽരഹിതർക്ക് 2026 ആകുമ്പോഴേക്കും തൊഴിൽ നൽകുന്നതിന് കേരള നോളജ് ഇക്കണോമി മിഷൻ തയാറാക്കിയ പദ്ധതിരേഖക്ക് മന്ത്രിസഭയുടെ അംഗീകാരം. വിവിധ ഏജൻസികളുടെ സഹകരണത്തോടെ നടപ്പാക്കുന്ന പദ്ധതിക്ക് 6000 കോടി രൂപ ചെലവു പ്രതീക്ഷിക്കുന്നു. ഈ മേഖലക്കുള്ള ബജറ്റ് വിഹിതം 200 കോടിയിൽനിന്ന് 300 കോടിയായി വർധിപ്പിച്ചിരുന്നു.

ഇനി വിശദ പദ്ധതി റിപ്പോർട്ട് തയാറാക്കുകയും നടപടിക്രമങ്ങൾ പാലിച്ച് സർക്കാരിന്റെ അംഗീകാരം നേടുകയും ചെയ്യണം. തൊഴിൽ നഷ്ടപ്പെട്ട് നാട്ടിൽ മടങ്ങിയെത്തിയ പ്രവാസികൾ, പഠനം പൂർത്തിയാക്കാത്തവർ, വീട്ടിലിരുന്നു ജോലി ചെയ്യാൻ താൽപര്യമുള്ളവർ തുടങ്ങിയവരെ ലക്ഷ്യം വച്ചുള്ള പദ്ധതികളാണ് കെ-ഡിസ്‌ക്കിന് കീഴിലുള്ള നോളജ് ഇക്കണോമി മിഷൻ ലക്ഷ്യമിടുന്നത്.

തൊഴിൽദായകരെയും തൊഴിൽ അന്വേഷകരെയും പരിശീലകരെയും ഡിജിറ്റൽ വർക്‌ഫോഴ്‌സ് മാനേജ്‌മെന്റ് സിസ്റ്റം എന്ന സംവിധാനത്തിലൂടെ ഏകോപിപ്പിക്കും. ബജറ്റ് തുകക്ക് പുറമേ പണം കണ്ടെത്തുന്നതിന് ലോക ബാങ്ക്, എഡിബി, ഇന്റർനാഷനൽ ഫിനാൻസ് കോർപറേഷൻ എന്നിവയുമായി ബന്ധപ്പെട്ട് മാർഗങ്ങൾ ആരായും. ഇതിനായി ധനവകുപ്പിന്റെയും കേന്ദ്ര ധനമന്ത്രാലയത്തിന്റെയും അനുമതിയോടെ പ്രാഥമിക കൂടിയാലോചന നടത്താൻ കെ-ഡിസ്‌ക്കിന് അനുമതി നൽകി.