വയനാട് : തലശ്ശേരി-മൈസൂരു റെയിൽപ്പാതക്കായുള്ള ഹെലിബോൺ ജോഗ്രഫിക്കൽ മാപ്പിങ്ങിനുള്ള സർവേയുടെ ട്രയൽ റൺ പൂർത്തിയായി. ഹെലികോപ്റ്റർ ഉപയോഗിച്ചുള്ള സർവേയുടെ ട്രയൽ റൺ ചൊവ്വാഴ്ച ഉച്ചയ്ക്ക് 12 മണിയോടെയാണ് നടത്തിയത്. 

ഇലക്‌ട്രോ മാഗ്നറ്റിക്ക് ഇൻസ്ട്രുമെന്റ് ഉപയോഗിച്ചാണ് സർവേ. 700 കിലോയോളം ഭാരമുള്ള ഈ മെഷീൻ ഹെലികോപ്റ്ററിൽ ഘടിപ്പിച്ച്, റെയിൽപ്പാതയുടെ അലൈൻമെന്റ് നിശ്ചയിച്ച ഭാഗങ്ങളിലൂടെ പറന്നാണ് സർവേ. ഹെലികോപ്റ്റർ ഭൂനിരപ്പിൽനിന്ന് 50 മീറ്റർ ഉയരത്തിൽ പറന്നാണ് സർവേ നടത്തുക. ഹെലികോപ്റ്ററിൽനിന്ന് 20 മീറ്റർ താഴെയായാണ് ഇലക്‌ട്രോ മാഗ്നറ്റിക്ക് ഇൻസ്ട്രുമെന്റ് പ്രത്യേക റോപ്പുകൾ ഉപയോഗിച്ച് ഘടിപ്പിക്കുക. ഇതുപയോഗിച്ച് ഭൂനിരപ്പിൽനിന്ന് 500 മീറ്റർവരെ താഴ്ചയിലേക്കുള്ള കാര്യങ്ങൾ നിരീക്ഷിക്കും. ഭൂമിയുടെ ഘടന, മണ്ണിന്റെയും പാറക്കെട്ടുകളുടെയും സ്വഭാവം, ജലസ്രോതസ്സുകൾ തുടങ്ങിയവയെല്ലാം പരിശോധിക്കും.

കൊങ്കൺ റെയിൽവേ കോർപ്പറേഷനുവേണ്ടി ഹൈദരാബാദ് ആസ്ഥാനമായ നാഷണൽ ജോഗ്രഫിക് റിസർച്ച് ഇൻസ്റ്റിറ്റ്യൂട്ട് (സി.എസ്.ഐ.ആർ.എൻ.ജി.ആർ.ഐ.) ആണ് സർവേ നടത്തുന്നത്. ഇൻസ്റ്റിറ്റ്യൂട്ട് ഡയറക്ടർ വി.എം. ദിവാരിയാണ് സർവേ പ്രവർത്തനങ്ങൾ നിയന്ത്രിക്കുന്നത്. ഇലക്‌ട്രോ മാഗ്നറ്റിക്ക് ഇൻസ്ട്രുമെന്റിന്റെ പ്രവർത്തനങ്ങൾ നിയന്ത്രിക്കുന്നതിനായി ഡെൻമാർക്കിൽനിന്നും രണ്ട് എൻജിനിയർമാരും സർവേ സംഘത്തിനൊപ്പമുണ്ട്.

സെയ്ന്റ് മേരീസ് കോളേജ് മൈതാനത്തോടുചേർന്നുള്ള ഹെലിപ്പാട് ബേസ് ഗ്രൗണ്ടായാണ് സർവേ നടത്തുന്നത്. അനുകൂല സാഹചര്യമാണെങ്കിൽ രണ്ടുദിവസത്തിനുള്ളിൽ വയനാട്ടിലെ സർവേ പൂർത്തിയാക്കിയശേഷം സംഘം തലശ്ശേരിയിലേക്ക് പോകുമെന്നാണ് വിവരം. റെയിൽപ്പാതയുടെ അലൈൻമെന്റിന്റെ കൂടുതൽ വിശദാംശങ്ങൾ വെളിപ്പെടുത്താൻ സർവേ സംഘം തയ്യാറായിട്ടില്ല.