ഇരിട്ടി: സ്കൂൾ ഭരണ സമിതി അംഗങ്ങൾ തമ്മിലുള്ള നിയമർക്കത്തെ തുടർന്ന് വർഷങ്ങളായി ഭരണ പ്രതിസന്ധിയിലായ ഇരിട്ടി ഹയർ സെക്കന്ററി സ്കൂൾ ഭരണം ശ്രീ കീഴൂരിടം തറവാട് ട്രസ്റ്റിന് വിട്ടുതരികയോ അല്ലാത്തപക്ഷം സർക്കാർ ഏറ്റെടുത്ത് സംരക്ഷിക്കണമെന്നും ശ്രീകീഴൂരിടം തറവാട് ട്രസ്റ്റ് ഭരണസമിതി യോഗം സർക്കാരിനോട് ആവശ്യപ്പെട്ടു. ഇതേ ആവശ്യമുന്നയിച്ച് സർക്കാരിന് നിവേദനം നൽകാനും യോഗം തീരുമാനിച്ചു. അക്കാദമിക് നിലവാരത്തിലും പഠനേതര മേഖലകളിലും മികവ് പുലർത്തി ജില്ലയിൽ തന്നെ മികവാർന്ന നിലയിൽ ഉയർന്നു നിൽക്കുന്ന ഈ വിദ്യാലയം നിയമതർക്കത്തെ തുടർന്ന് സംരക്ഷിക്കാനാളില്ലാതെ ശോചനീയാവസ്ഥയിലായിരിക്കുകയാണ്. പൊതുവിദ്യാലയ രംഗത്ത് ഉയർന്ന നിലവാരം പുലർത്തുന്ന ഈ വിദ്യാലയത്തെ സംരക്ഷിക്കാൻ സർക്കാർ ഇടപെടൽ അനിവാര്യമാണെന്നും യോഗം ചൂണ്ടികാട്ടി. പ്രസിഡന്റ് കെ.മോഹൻദാസ് വാഴുന്നവർ അധ്യക്ഷനായി. ഭാരവാഹികളായ കെ. ഭുവനദാസൻ വാഴുന്നവർ, കെ.ഇ. നാരായണൻ, കെ.ഇ. കമലകുമാരി, കെ. രാധാകൃഷ്ണൻ ,ടി.എം. ശ്രീകുമാർ ,കെ. വിക്രമൻ, കെ. സതീദേവി എന്നിവർ സംസാരിച്ചു.