മുതുകുളം (ആലപ്പുഴ) : ഭാര്യവീടിന്റെ മുറ്റത്ത് യുവാവിനെ ദുരൂഹ സാഹചര്യത്തിൽ മരിച്ചനിലയിൽ കണ്ടെത്തി. കോട്ടയം ഈരാറ്റുപേട്ട നടയ്ക്കൽ തയ്യിൽ ടി.എ.മുഹമ്മദ് കോയയുടെ മകൻ അഷ്കർ മുഹമ്മദിനെയാണു (23) ഭാര്യ മുതുകുളം തെക്ക് കുറുങ്ങാട്ട്ചിറയിൽ മഞ്ജുവിന്റെ വീടിന്റെ മുറ്റത്ത് മരിച്ചനിലയിൽ കണ്ടത്.

മൃതദേഹത്തിന്റെ കഴുത്തിന്റെ ഭാഗത്ത് ചില പാടുകളുണ്ട്, ഇത് നേരത്തെ ഉണ്ടായിരുന്നതാണോ എന്നത് സംബന്ധിച്ച് പോസ്റ്റ്മോർട്ടത്തിന് ശേഷമേ വ്യക്തത കൈവരൂ എന്ന് പൊലീസ് പറഞ്ഞു. 

അഷ്കർ രാവിലെ നാലിന് വീടിന് പുറത്തേക്ക് ഇറങ്ങിയ ശേഷം മടങ്ങിവന്നില്ല. തുടർന് നടത്തിയ തിരച്ചിലിൽ ആറരയോടെ മരിച്ച നിലയിൽ കണ്ടെത്തുകയായിരുന്നെന്നും പൊലീസ് പറയുന്നു. ഫൊറൻസിക് വിദഗ്ധരെത്തി പരിശോധന നടത്തി. മൃതദേഹം പോസ്റ്റ്മോർട്ടത്തിനായി ആലപ്പുഴ മെഡിക്കൽ കോളജ് ആശുപത്രിയിലേക്ക് മാറ്റി.

വിദേശത്തായിരുന്ന അഷ്കർ മടങ്ങിയെത്തിയ ശേഷം എറണാകുളത്ത് ഡ്രൈവറായി ജോലി നോക്കുകയായിരുന്നു. ഇതിനിടെയാണ് സമൂഹമാധ്യമം വഴി പരിചയപ്പെട്ട മഞ്ജുവിനെ മൂന്നുമാസം മുൻപ് വിവാഹം കഴിച്ചത്. മഞ്ജുവിന്റെ രണ്ടാം വിവാഹമാണിത്. വിവാഹശേഷം ഇരുവരും ഒന്നര മാസത്തോളം കൊച്ചിയിലായിരുന്നു താമസം. പിന്നീട് മഞ്ജുവിന്റെ വീട്ടിലേക്ക് താമസം മാറി. തുടർന്ന് അഷ്കർ വെട്ടത്തുമുക്ക് ഭാഗത്തെ കടയിൽ ജോലിയിൽ പ്രവേശിച്ചു. മഞ്ജുവും മാതാവ് വിജയമ്മയും മാത്രമാണു വീട്ടിലുള്ളത്. വിജയമ്മയുടെ ഭർത്താവ് മണിലാൽ ദുബായിലാണ്.