ഇരിട്ടി : മാക്കൂട്ടം അതിർത്തിയിൽ തുടരുന്ന യാത്രാ നിയന്ത്രണവും ആർ.ടി.പി.സി.ആർ. പരിശോധനയും പിൻവലിക്കണ മെന്നാവശ്യപ്പെട്ട് കേരള ചീഫ് സെക്രട്ടറി ഡോ.വി. പി. ജോയ് ഐ.എ.എസ് കർണാടക ചീഫ് സെക്രട്ടറി പി. രവികുമാർ ഐ.എ.എസിന് കത്തയച്ചു. കഴിഞ്ഞ ആഴ്ച ഇത് സംബന്ധിച്ച് ബി.ജെ.പി കണ്ണൂർ ജില്ലാ പ്രസിഡന്റ് ഉൾപ്പെടെയുള്ളവർ വീരാജ്പേട്ട എം എൽ എ കെ.ജി. ബോപ്പയ്യയെയും കുടക് ഡി സി ഡോ . സതീഷിനെയും നേരിൽക്കണ്ട് നിവേദനം നൽകിയപ്പോൾ ഇക്കാര്യം സൂചിപ്പിച്ചിരുന്നു. ഈ വിഷയത്തിൽ കേരള മുഖ്യമന്ത്രിയോ ആരോഗ്യമന്ത്രിയോ കർണ്ണാടക മുഖ്യമന്ത്രിയുമായോ ആരോഗ്യമന്ത്രിയുമായോ സംസാരിച്ചിട്ടില്ലെന്ന് പറയുകയും ഉടനടി ഫോൺവ ഴിയെങ്കിലും ബന്ധപ്പെടണമെന്നും പറഞ്ഞിരുന്നു.

സണ്ണി ജോസഫ് എം.എൽ.എ.യും ഈ വിഷയം സംബന്ധിച്ച് കേരള മുഖ്യമന്ത്രിക്ക് നിവേദനം നൽകിയപ്പോൾ ചീഫ് സെക്രട്ടറിയെ കർണ്ണാടകയുമായി ബന്ധപ്പെടാൻ ചുമതലപ്പെടുത്തിയതായി മുഖ്യമന്ത്രി മറുപടി നൽകിയിരുന്നു. കേരളത്തിൽ കോവിഡ് പ്രതിരോധപ്രവർത്തനങ്ങൾ ശക്തമായി നടന്നിട്ടുണ്ടെന്നും യോഗ്യരായ 95 ശതമാനം ആളുകൾക്കും ഫസ്റ്റ് ഡോസ് വാക്സിനും 60 ശതമാനം ആളുകൾക്ക് സെക്കൻഡ് ഡോസ് വാക്സിനും നൽകിയതായും ചീഫ് സെക്രട്ടറിയുടെ കത്തിൽ പരാമർശിച്ചിട്ടുണ്ട്. ഈ സാഹചര്യത്തിൽ കേരളത്തിൽ നിന്നുള്ള യാത്രക്കാർക്ക് മാക്കൂട്ടം ചെക്ക് പോസ്റ്റിൽ ആർ.ടി.പി.സി.ആർ. നെഗറ്റീവ് സർട്ടിഫിക്കറ്റ് ഹാജരാക്കണമെന്ന നിബന്ധന പിൻവലിക്കണമെന്നാണ് കത്തിലുള്ളത്.