കണ്ണൂർ: കോവിഡ് പരിശോധന നടത്തുന്ന മൊബൈൽ ആർ.ടി.പി.സി.ആർ. ടെസ്റ്റിങ് ലാബ് ഇനിയില്ല.സർക്കാർ സംവിധാനത്തിൽ ജില്ലയിലുടനീളം സഞ്ചരിച്ച് സാമ്പിൾ പരിശോധനാ റിപ്പോർട്ട് നൽകുന്ന സംവിധാനം ശനിയാഴ്ച മുതൽ പ്രവർത്തിക്കില്ല. നവംബർ 19-നുശേഷം മൊബൈൽ ലാബിന്റെ പരിശോധനാ ഷെഡ്യൂൾ ഇട്ടിട്ടില്ലെന്ന് ജില്ലയിൽ ടെസ്റ്റിങ് ചുമതലയുള്ള ഓഫീസറായ ഡോ. അഖിൽ നമ്പ്യാർ പറഞ്ഞു.

സർക്കാർ ഉത്തരവ് കിട്ടിയതിനെത്തുടർന്ന് ജില്ലയിൽ നവംബർ 12 മുതൽ ലാബ് പരിശോധനയുണ്ടാകില്ലെന്ന് ഡെപ്യൂട്ടി ഡി.എം.ഒ. ഡോ. എം.പ്രീത അറിയിച്ചിരുന്നു. എന്നാൽ ഒരാഴ്ചകൂടി തുടരാൻ അനുമതി ലഭിച്ചിട്ടുണ്ടെന്ന് ഏജൻസിയായ സാൻഡർ മെഡിക്കൽസ് അറിയിച്ചതിനെത്തുടർന്ന് പരിശോധന തുടരുകയായിരുന്നു.

സർക്കാർ ടെസ്റ്റിങ്ങില്ലാത്തത് സ്കൂൾ വിദ്യാർഥികൾ ഉൾപ്പെടെയുള്ളവരെ ബാധിക്കും. പല മീറ്റുകളും പരിപാടികളും ഇനി നടക്കാനുണ്ട്. അവയിൽ പങ്കെടുക്കണമെങ്കിൽ ആർ.ടി.പി.സി.ആർ. നെഗറ്റീവ് സർട്ടിഫിക്കറ്റ് വേണം. സർക്കാർതലത്തിൽ ഇല്ലാതിരിക്കുമ്പോൾ സ്വകാര്യ ലാബുകളെയാണ് ആശ്രയിക്കേണ്ടത്. ശസ്ത്രക്രിയയും മറ്റും ഇപ്പോൾ ആന്റിജൻ ടെസ്റ്റ് നടത്തിയാണ് ചെയ്യുന്നത്.

ലാബ്‌ ടെസ്റ്റിങ് നിലച്ചു

ആവശ്യത്തിന് ജീവനക്കാരില്ലാത്തതിനാൽ സർക്കാർ സെക്ടറിൽ ആർ.ടി.പി.സി.ആർ. ടെസ്റ്റിങ് രണ്ടാഴ്ചയായി നിർത്തിവച്ചിരിക്കുകയാണ്.

കണ്ണൂർ റീജണൽ പബ്ലിക് ഹെൽത്ത് ലാബ്, തലശ്ശേരി മലബാർ കാൻസർ സെന്റർ, ഗവ. മെഡിക്കൽ കോളേജ് എന്നിവിടങ്ങളിലാണ് കേന്ദ്രങ്ങളുണ്ടായിരുന്നത്.

കോവിഡ് ബ്രിഗേഡുമാരെ പിരിച്ചുവിട്ടപ്പോൾ മുതൽ ഇവയുടെ പ്രവർത്തനം നിലച്ചു. ആർ.ടി.പി.സി.ആർ. ലാബുകളിൽ താത്കാലിക ജീവനക്കാരെ നിയമിച്ച് ടെസ്റ്റിങ് നടത്താനാണ് ശ്രമം.

46 പേരെ നിയമിക്കും

താത്കാലികാടിസ്ഥാനത്തിൽ എൻ.എച്ച്.എം. മുഖാന്തരം ജീവനക്കാരെ നിയമിക്കുന്നുണ്ട്. കൺട്രോൾ സെൽ, റീജണൽ പബ്ലിക് ഹെൽത്ത് ലാബ്, കണ്ണൂർ ഗവ. മെഡിക്കൽ കോളേജ്, തലശ്ശേരി മലബാർ കാൻസർ സെന്റർ എന്നിവിടങ്ങളിലേക്ക് 46 പേരെ നിയമിക്കും. ഡിസംബർ 31 വരെയാണുണ്ടാവുക. ജില്ലാ മെഡിക്കൽ ഓഫീസ് വഴിയാണ് നിയമനം. കോവിഡ് ബ്രിഗേഡിൽ ജോലിചെയ്തവർക്ക് മുൻഗണന നൽകും.