കൊച്ചി: മൊബൈലിൽ കളിച്ചതിന് അമ്മ ശാസിച്ചതിനാണ് അവൻ വീടുവിട്ടിറങ്ങിയത്. ദിവസങ്ങൾക്കപ്പുറം അവനെ കണ്ടെത്തിയത് തമിഴ്‌നാട്ടിൽ നിന്നാണ്. പ്രായം 15. ഇനി മൊബൈൽ തരില്ലെന്ന ശാസനയിൽ മനംനൊന്ത് ആത്മഹത്യയ്ക്ക് ശ്രമിച്ചത് പതിന്നാലുകാരനാണ്. വീട്ടുകാർ കണ്ടതിനാൽ ദുരന്തം ഒഴിവായി. ഗെയിം കളിക്കാൻ പണത്തിന് വഴിയിലിറങ്ങിനിന്ന് പത്തുരൂപ വീതം പലരോടായി ഇരന്നുവാങ്ങുകയായിരുന്നു മറ്റൊരു പന്ത്രണ്ടുകാരൻ. ഓൺലൈൻ ഗെയിം കുരുക്കിൽ രണ്ടുവിദ്യാർഥികൾക്ക് ജീവൻ നഷ്ടമായതും ഇക്കഴിഞ്ഞദിവസങ്ങളിലാണ്.

കഥകളെ വെല്ലുന്ന ഇത്തരത്തിലുള്ള നേരനുഭവങ്ങൾ ഏറെയുണ്ട് നമുക്ക് ചുറ്റും. ഗെയിമുകളും മൊബൈലും കംപ്യൂട്ടറുമൊക്കെത്തന്നെയാണ് എല്ലായിടത്തും വില്ലൻ. വിദ്യാർഥികൾക്കിടയിൽ സ്ക്രീൻ, ഗെയിം ഭ്രമം കൂടുന്നതായാണ് അധ്യാപകരും മാനസികാരോഗ്യവിദഗ്ധരുമെല്ലാം സാക്ഷ്യപ്പെടുത്തുന്നത്.

ഇടപെടേണ്ടി വരുന്ന 750 വിദ്യാർഥികളിൽ 50 പേർക്ക് ഓൺലൈൻ അഡിക്‌ഷനുമായി ബന്ധപ്പെട്ട പ്രശ്നങ്ങളുണ്ടെന്ന് വനിതാ- ശിശുവികസനവകുപ്പിന് കീഴിലെ സൈക്കോ സോഷ്യൽ സ്കൂൾ കൗൺസിലറായ മഹിത വിപിനചന്ദ്രൻ പറഞ്ഞു. മൊബൈൽ ഉപയോഗവും ഗെയിമും നിഷേധിക്കുമ്പോൾ 14-നും 18-നും ഇടയിൽ പ്രായമുള്ളവർ അക്രമാസക്തരാകും. ഇതിൽ ചെറിയ പ്രായത്തിലുള്ളവരിൽ ശ്രദ്ധക്കുറവ് ഉൾപ്പെടെയുള്ള പ്രശ്നങ്ങളും പിടിമുറുക്കും -മഹിത പറഞ്ഞു.

ചൈൽഡ് ലൈനിൽ ലഭിക്കുന്ന പരാതികളിൽ പകുതിയിലധികവും ഒാൺലൈൻ ഉപയോഗവുമായി ബന്ധപ്പെട്ടാണെന്ന് നോഡൽ കോ-ഒാർഡിനേറ്റർ അരുൺ തങ്കച്ചൻ പറഞ്ഞു.

പ്രശ്നങ്ങൾ ഇങ്ങനെ

• ക്ലാസിൽ ഇരിക്കാൻ വിമ്മിട്ടം, ശ്രദ്ധക്കുറവ്
• ആശയവിനിമയക്കുറവ്
• തനിച്ചിരിക്കൽ, മുറിയടച്ചിരിക്കൽ
• അകാരണമായ ദേഷ്യം, അസ്വസ്ഥത

ശ്രദ്ധിക്കാം ഇവ

രണ്ടുമുതൽ അഞ്ചുവയസ്സുവരെയുള്ള കുട്ടികളുടെ സ്ക്രീൻ ഉപയോഗം കഴിവതും ഒഴിവാക്കണം. മറിച്ചുള്ള സാഹചര്യങ്ങളിൽ മുതിർന്നവരുടെ സാന്നിധ്യം വേണം. അഞ്ചുമുതൽ 18 വയസ്സുവരെയുള്ളവർക്ക് സ്ക്രീൻ ഉപയോഗത്തിന് കൃത്യമായ നിർദേശങ്ങൾ നൽകണം. ഇത് കുട്ടികളുമായി ചർച്ചചെയ്തു തീരുമാനിക്കാം.

പാരന്റൽ കൺട്രോൾ സോഫ്റ്റ്‌വേറുകൾ ഉപയോഗപ്പെടുത്തി സുരക്ഷിതമായ ബ്രൗസിങ് ഉറപ്പുവരുത്തണം. കുടുംബാംഗങ്ങളുടെ ശ്രദ്ധ കിട്ടുന്നരീതിയിൽ കംപ്യൂട്ടറും ലാപ്‌ടോപ്പും വെക്കാൻ ശ്രദ്ധിക്കണം. ഓൺലൈൻ ക്ലാസുകൾ മുറിയടച്ചിട്ട് വേണ്ടെന്ന് നിർദേശിക്കാം.

‘സജ്ജം’ വീണ്ടും

ഓൺലൈൻ ഗെയിമുകൾക്കും സൈബർ ചതിക്കുഴികൾക്കും എതിരേയുള്ള ‘സജ്ജം’ കാമ്പയിൻ വീണ്ടും തുടങ്ങാനുള്ള ഒരുക്കത്തിലാണ് വിദ്യാഭ്യാസവകുപ്പ്. പരീക്ഷകളെത്തുടർന്ന് നിർത്തിവെച്ച കാമ്പയിൻ ഓൺലൈനിൽ പുനരാരംഭിക്കാനാണ് ആലോചിക്കുന്നത്. സി.എം. അസീം, കരിയർ ഗൈഡൻസ് ആൻഡ് അഡോളസെന്റ് കൗൺസലിങ് സെൽ സംസ്ഥാന കോ-ഓർഡിനേറ്റർ.