സ്‌മാർട്ട് ഫോണുകളുടെയും സ്‌മാർട്ട് ഡിവൈസുകളുടെയും കാലമാണിപ്പോൾ. സ്‌മാർട്ട് വാച്ച്, സ്‌പീക്കർ അങ്ങനെ ഇന്റർനെ‌റ്റുമായി അതിവേഗം കണക്‌ട് ചെയ്യാൻ സഹായിക്കുന്ന പല ഡിവൈസുകളും ഇന്നുണ്ട്. ഇവയ്‌ക്കെല്ലാം വേണ്ട ഇന്റർനെ‌റ്റ് കണക്‌ടിവി‌റ്റിയിൽ എന്നാൽ ഇപ്പോഴും വേണ്ടത്ര വേഗമുണ്ടായിട്ടില്ല. ഈ പ്രശ്‌നം പരിഹരിക്കാൻ പുതിയൊരു സാങ്കേതിക വിദ്യ രംഗപ്രവേശം ചെയ്‌തിട്ടുണ്ട്. ‘വൈഫൈ ഹാലോ’ എന്നാണ് ഇതിന്റെ പേര്. ഒരുകിലോമീ‌റ്റർ പരിധിയിൽ വരെ വൈഫൈ കണക്ഷൻ ലഭിക്കുന്ന സാങ്കേതിക വിദ്യയാണിത്.

ഒരു കിലോമീ‌റ്റർ പരിധിയിൽ സ്‌മാർട്ട് സ്‌പീക്കർ, സ്‌മാർട്ട് എയർ കണ്ടീഷണറുകൾ മറ്റ് വ്യാവസായികമായി ഉപയോഗിക്കുന്ന ഇന്റർനെ‌റ്റ് ആവശ്യമായ ഉപകരണങ്ങൾ എന്നിവയെ ബന്ധിപ്പിക്കാനാണ് വൈഫൈ ഹാലൊ വികസിപ്പിച്ചെടുത്തത്. വൈഫൈ കേന്ദ്രീകൃത കമ്പനികളുടെ അംഗീകൃത സംഘടനയായ വൈഫൈ അലയൻസ് അംഗീകരിച്ചതാണ് വൈഫൈ ഹാലോ. നിലവിൽ വൈഫൈ വഴി ബന്ധിപ്പിക്കാവുന്ന ഉപകരണങ്ങളെയെല്ലാം വൈഫൈ ഹാലോ വഴിയും ബന്ധിപ്പിക്കാം.

ഇപ്പോഴുള‌ള വൈഫൈ നെ‌റ്റ്‌വർക്കുകളെക്കാൾ കുറഞ്ഞ വൈദ്യുതിയേ വൈഫൈ ഹാലോ എടുക്കുന്നുള‌ളു. നിലവിൽ 2.4 ജിഗാഹെട്‌സ് മുതൽ 5 ജിഗാഹെട്‌സ് വരെയെടുത്താണ് ഇപ്പോൾ വൈഫൈ പ്രവർത്തിക്കുന്നത്. എന്നാൽ വൈഫൈ ഹാലോ ഒരു ജിഗാഹെട്‌‌സ് സ്‌പെക്‌ട്രത്തിലാണ് മികച്ച പ്രവർത്തനം കാഴ്‌ചവയ്‌ക്കുന്നത്. ചെറിയ ഫ്രീക്വൻസിയുള‌ള വൈഫൈ ഹാലോ വളരെ ദൂരെ വരെ വിവരകൈ‌മാ‌റ്റത്തിന് സഹായിക്കും.

വീടുകളിലും വ്യവസായ ശാലകളിലുമുള‌ള സ്‌മാർട്ട് ഉപകരണങ്ങളെ ബന്ധിപ്പിക്കാനും നഗരങ്ങളിൽ ട്രാഫിക് സിഗ്‌നലുകൾ, ട്രാഫിക് മോണി‌റ്ററുകൾ എന്നിവയുമായി ബന്ധപ്പെടുത്തി നഗരത്തിൽ ഉപയോഗിക്കാം. എന്നാൽ ലോകമാകെ ഈ സാങ്കേതികവിദ്യ എന്നുമുതൽ പ്രായോഗത്തിൽവരും എന്ന കാര്യത്തിൽ ഇനിയും തീരുമാനം വരേണ്ടതുണ്ട്.