കണ്ണൂർ: കേന്ദ്രനിർദേശപ്രകാരം തൊഴിലുറപ്പ് പദ്ധതിയുടെ കൂലി വിതരണം പട്ടികജാതി, പട്ടികവർഗ വിഭാഗത്തിന്‌ പ്രത്യേകമാക്കിയതോടെ സംസ്ഥാനത്ത് ഇവരുടെ കൂലി വിതരണം ഒരുമാസമായി മുടങ്ങി.

പട്ടികജാതി വിഭാഗത്തിന് 84.55 കോടി രൂപയും പട്ടികവർഗ വിഭാഗത്തിന് 27.92 കോടി രൂപയുമാണ് കുടിശ്ശികയായത്. ആകെ 112.47 കോടി രൂപ. ദിവസക്കൂലി 291 രൂപയാണെന്നിരിക്കെ 38 ലക്ഷത്തോളം തൊഴിൽദിനങ്ങളുടെ കൂലി വരുമിത്. കണ്ണൂർ ജില്ലയിൽ മാത്രം രണ്ടുവിഭാഗത്തിനും കൂടി 17 കോടിയോളം രൂപ കിട്ടാനുണ്ട്. തൊഴിലുറപ്പ് പദ്ധതിയുടെ ചുമതല വഹിക്കുന്ന ഗ്രാമ-ബ്ലോക്ക് പഞ്ചായത്ത് ഓഫീസുകളിലും ജില്ലാ ഓഫീസിലും കൂലിക്കുവേണ്ടി നിരന്തരം ഫോൺവിളിയാണിപ്പോൾ. സാധാരണ പണിയെടുത്ത് രണ്ടാഴ്ചയ്ക്കകം കൂലി കിട്ടുമായിരുന്നു. ഇപ്പോൾ 124 ദിവസം മുൻപ്‌ ചെയ്ത ജോലിയുടെ കൂലി കിട്ടാത്തവരുണ്ട്.

നേരത്തെ ജാതിഭേദമെന്യേ പൊതുഫണ്ടിൽനിന്ന് എല്ലാവർക്കും കൂലി നൽകുകയായിരുന്നു രീതി. നടപ്പുസാമ്പത്തികവർഷംമുതൽ പട്ടികജാതി/പട്ടികവർഗ വിഭാഗങ്ങൾക്ക് കേന്ദ്ര നിർദേശപ്രകാരം പ്രത്യേക ഫണ്ടിൽ നിന്നാക്കി. കഴിഞ്ഞ സെപ്റ്റംബറോടെ ഈ ഫണ്ട് തീർന്നു. പൊതുവിഭാഗത്തിൽ അന്ന് കുറച്ച് പണം ബാക്കിയുണ്ടായിരുന്നെങ്കിലും അതിൽ നിന്നെടുക്കാൻ അനുവാദമില്ലായിരുന്നു. രണ്ടാഴ്ച മുൻപ്‌ ആ ഫണ്ടും തീർന്നു. അവിടെയും 100 കോടിയോളം രൂപ കുടിശ്ശികയായി. പട്ടികവിഭാഗങ്ങളുമായി താരതമ്യം ചെയ്യുമ്പോൾ ഇത് കുറവാണ്. 34.36 ലക്ഷം തൊഴിൽദിനങ്ങളുടെ കൂലിയേ വരൂ ഇത്.

കേരളത്തിന് ആകെ ഏഴരക്കോടി തൊഴിൽദിനങ്ങളാണ് ഈ വർഷം അനുവദിച്ചത്. നവംബറായപ്പോഴേക്കും ഇതിൽ 4,74,89,298 കോടി ദിനങ്ങൾ ഉപയോഗിച്ചുകഴിഞ്ഞു. 5,25,886 പട്ടികജാതി കുടുംബങ്ങളും 1,28,160 പട്ടികവർഗ കുടുംബങ്ങളുമാണ് ഈ വർഷം തൊഴിലുറപ്പ് പദ്ധതിയിൽ രജിസ്റ്റർ ചെയ്തത്. കോവിഡ് ദുരിതത്തിന്റെ പശ്ചാത്തലത്തിൽ കേരളം ഈ വർഷം 10.26 കോടി തൊഴിൽദിനങ്ങൾ ആവശ്യപ്പെട്ടെങ്കിലും ഏഴരക്കോടിയേ അനുവദിച്ചുള്ളൂ. അഞ്ചുമാസം അവശേഷിച്ചിരിക്കെ അതിൽ 63 ശതമാനം ഉപയോഗിച്ചുകഴിഞ്ഞത് തൊഴിലില്ലായ്മയുടെ രൂക്ഷത വെളിവാക്കുന്നു. ഈ സാഹചര്യത്തിൽ കൂടുതൽ തുക അനുവദിക്കാൻ കേന്ദ്രം നടപടികളെടുത്തുവരികയാണെന്ന് പദ്ധതിയുടെ സംസ്ഥാനതല ചുമതല വഹിക്കുന്നവർ പറയുന്നു.