കണ്ണൂർ : ദേശീയ സീനിയർ വനിതാ ഫുട്‌ബോൾ ചാമ്പ്യൻഷിപ്പിലൂടെ ജില്ലയിൽ വീണ്ടും ഫുട്‌ബോൾ ആരവമെത്തുന്നു. കൂത്തുപറമ്പ്‌ നഗരസഭാ സ്‌റ്റേഡിയത്തിൽ 26 മുതലാണ്‌ ചാമ്പ്യൻഷിപ്പിലെ ഗ്രൂപ്പ്‌ മത്സരങ്ങൾ. കളിക്കളങ്ങളിൽ ആവേശവും ഗ്യാലറികളിൽ ആരവങ്ങളും നിലച്ച കോവിഡ്‌ കാലത്തിൽനിന്നുള്ള ഉണർവുകൂടിയാകും കൂത്തുപറമ്പിൽ ആദ്യമായെത്തുന്ന ദേശീയ ചാമ്പ്യൻഷിപ്പ്‌. 

ജില്ലയിൽ കണ്ണൂർ ജവഹർ സ്‌റ്റേഡിയത്തിൽ മാത്രമാണ്‌ ദേശീയതല ഫുട്‌ബോൾ ടൂർണമെന്റുകൾ ഇതുവരെ നടന്നത്‌. ദേശീയ നിലവാരത്തിലുള്ള ടൂർണമെന്റ്‌ നടത്തുന്നതിന്‌ സൗകര്യമുള്ള മൈതാനം കണ്ണൂരിൽമാത്രമായിരുന്നു. കൂത്തുപറമ്പ്‌ സ്‌റ്റേഡിയത്തിലടക്കം നേരത്തെ സെവൻസ്‌ ടൂർണമെന്റുകളാണ്‌ കാൽപന്തുകളിയുടെ ആവേശം നിറച്ചിരുന്നത്‌. കണ്ണൂർ ജവഹർ സ്‌റ്റേഡിയത്തിൽ അമ്പതുകളുടെ ആദ്യത്തിലാണ്‌ ചന്തൻ മെമ്മോറിയൽ ടൂർണമെന്റ്‌ നടന്നത്‌. ജില്ലയിലെ ആദ്യത്തെ ദേശീയ മത്സരവും ഇതുതന്നെ. രണ്ടുപതിറ്റാണ്ടിനുശേഷമാണ്‌ ശ്രീനാരായണ അഖിലേന്ത്യാ ഫുട്‌ബോൾ കണ്ണൂരിൽ നടക്കുന്നത്‌. 68ൽ സതേൺ റെക്ടാംഗുലർ കപ്പ്‌. 83 ൽ ആദ്യമായി ഫെഡറേഷൻ കപ്പ്‌ കണ്ണൂരിൽ വിരുന്നെത്തി. അറുപതിനായിരത്തിലേറെ കാണികളാണ്‌ അന്ന്‌ ജവഹർ സ്‌റ്റേഡിയത്തിൽ കളിയാവേശവുമായെത്തിയത്‌. ഫ്ലഡ്‌ലിറ്റിലായിരുന്നു മത്സരങ്ങൾ. 91 ൽ വീണ്ടും ഫെഡറേഷൻ കപ്പെത്തി. അതേവർഷംതന്നെ ഏഷ്യാകപ്പ്‌ ക്വാളിഫൈയിങ് റൗണ്ടിലെ രണ്ട്‌ മത്സരങ്ങളും നടന്നു. അടുത്ത വർഷം സിസേഴ്‌സ്‌ കപ്പ്‌ ഗ്രൂപ്പ്‌ മത്സരങ്ങളും കണ്ണൂരിലെത്തി.

കഴിഞ്ഞ എൽ.ഡി.എഫ്‌. സർക്കാർ ജില്ലയിൽ നിരവധി സ്‌റ്റേഡിയങ്ങളാണ്‌ മികച്ച നിലവാരത്തിലേക്കുയർത്തിയത്‌. അതിലൊന്നായിരുന്നു കൂത്തുപറമ്പ്‌ നഗരസഭാ സ്‌റ്റേഡിയം. നാണൂട്ടി ഫുട്‌ബോളിലുടെ സംസ്ഥാനത്തെ എണ്ണംനിന്ന ടീമുകളെല്ലാം കൂത്തുപറമ്പ്‌ സ്‌റ്റേഡിയത്തിൽ കളിക്കാനെത്തിയിരുന്നു. സ്‌റ്റേഡിയം നവീകരണം ആരംഭിച്ചതോടെയാണ്‌ നാണൂട്ടി ഫുട്‌ബോൾ നിർത്തിയത്‌. ദേശീയ സീനിയർ വനിതാ ഫുട്‌ബോൾ ചാമ്പ്യൻഷിപ്പിന്റെ ഗ്രൂപ്പ്‌, ക്വാർട്ടർ ഫൈനൽ മത്സരങ്ങളാണ്‌ കൂത്തുപറമ്പ്‌ സ്‌റ്റേഡിയത്തിൽ നടക്കുക. ഗ്രൂപ്പ്‌ എയുടെയും ഗ്രൂപ്പ്‌ സിയുടെയും മത്സരങ്ങളാണിവിടെ. 26 മുതൽ ഡിസംബർ മൂന്ന്‌ വരെയാണ്‌ ഗ്രൂപ്പ്‌ മത്സരങ്ങൾ. അഞ്ചിനാണ്‌ ക്വാർട്ടർ ഫൈനൽ. മണിപ്പൂർ, ദാമൻ ദിയു, പുതുച്ചേരി, മേഘാലയ എന്നിവയാണ്‌ ഗ്രൂപ്പ്‌ എയിൽ. ഗ്രൂപ്പ്‌ സിയിൽ ഹിമാചൽ പ്രദേശ്‌, അസാം, രാജസ്ഥാൻ, ബിഹാർ. രാവിലെ 9.30നും പകൽ മൂന്നിനുമാണ്‌ മത്സരങ്ങൾ.