പയ്യാവൂർ : ഇരിട്ടി ഭാഗത്തുനിന്നുള്ള സഞ്ചാരികൾക്ക് പൈതൽമലയിൽ എത്താൻ എളുപ്പമാർഗമായ വണ്ണായിക്കടവ്-നെല്ലിക്കുറ്റി-അരീക്കമല-ചാത്തമല റോഡ് കാൽനടപോലും അസാധ്യമാംവിധം തകർന്നു. റോഡ് നവീകരിക്കാനുള്ള ഒരു നടപടികളുമുണ്ടാകാത്തതിൽ നാട്ടുകാർക്ക് പ്രതിഷേധമുണ്ട്. 

മലയോര വിനോദസഞ്ചാര കേന്ദ്രങ്ങളായ കാഞ്ഞിരക്കൊല്ലി, ഏഴരക്കുണ്ട്, പൈതൽമല, പാലക്കയംതട്ട് എന്നിവയെ ബന്ധപ്പെടുത്തിയുള്ള ടൂറിസം സർക്യൂട്ട് യാഥാർഥ്യമാക്കുന്നതിനായി നവീകരണം നടത്തുന്ന റോഡുകൾക്കൊപ്പം ഈ റോഡിന്റെ വികസനവും നടത്തണമെന്നാണ് നാട്ടുകാരുടെ ആവശ്യം. 

റോഡ് പുനർനിർമിച്ച് മെക്കാഡം ടാറിങ് നടത്തിയാൽ പ്രദേശത്ത് വൻ വികസന മുന്നേറ്റത്തിനാണ് വഴിയൊരുങ്ങുക. പയ്യാവൂർ, ഏരുവേശ്ശി, നടുവിൽ പഞ്ചായത്തുകളിലൂടെ കടന്നുപോകുന്ന റോഡിന്റെ ഭൂരിഭാഗം സ്ഥലങ്ങളിലും നിലവിൽ എട്ടുമീറ്റർ വീതിയുണ്ട്. ചിലയിടങ്ങളിൽ റോഡിന് 10 മീറ്ററോളം വീതിയുണ്ട്. വീതി കുറവുള്ളയിടങ്ങളിൽ ആവശ്യമായ സ്ഥലവും ലഭ്യമാണ്. 

പഞ്ചായത്ത്, ബ്ലോക്ക് പഞ്ചായത്ത്, എം.എൽ.എ. ഫണ്ടുകളുപയോഗിച്ച് പലപ്പോഴായി ചെയ്തിട്ടുള്ള മൂന്നുമീറ്റർ വീതിയിലെ ടാറിങ് മാത്രമാണ് നിലവിലുള്ളത്. നാല് പട്ടികവർഗ കോളനികളടക്കം പത്തിലേറെ ജനവാസ കേന്ദ്രങ്ങളിലായി നിരവധി കുടുംബങ്ങൾ വസിക്കുന്ന പ്രദേശമാണിത്.

മൂന്ന് എൽ.പി. സ്കൂളുകൾ, രണ്ട് യു.പി. സ്കൂളുകൾ, രണ്ട് ഹൈസ്കൂളുകൾ, ഗവ. ആയുർവേദ, ഹോമിയോ ഡിസ്പെൻസറികൾ, വിവിധ ആരാധനാലയങ്ങൾ എന്നിവിടങ്ങളിലേക്ക് എത്തിച്ചേരാനുള്ള പ്രധാന മാർഗം കൂടിയാണിത്.

ഇരിക്കൂർ, ബ്ലാത്തൂർ, പയ്യാവൂർ വഴി 15 കിലോമീറ്റർ യാത്രചെയ്താലും യാത്രക്കാർക്ക് റോഡിലെത്താം. റോഡ് നവീകരിച്ചാൽ പൈതൽമല ഇക്കോ ടൂറിസ്റ്റ് കേന്ദ്രത്തിലേക്ക് സഞ്ചാരികൾക്ക് എളുപ്പത്തിൽ എത്തിച്ചേരാനാകും. റോഡ് നവീകരിക്കണമെന്നാവശ്യപ്പെട്ട് സജീവ് ജോസഫ് എം.എൽഎ., ജോൺ ബ്രിട്ടാസ് എം.പി., പി.ഡബ്ല്യു.ഡി. തളിപ്പറമ്പ് അസി. എക്സിക്യൂട്ടീവ് എൻജിനീയർ, ഇരിക്കൂർ അസി. എൻജിനീയർ എന്നിവർക്ക് റോഡ് വികസന സമിതി കൺവീനർ ജോണി തോമസ് കൊരട്ടിപറമ്പിൽ നിവേദനം നൽകിയിട്ടുണ്ട്.