കോഴിക്കോട് : വാടകക്കുടിശ്ശിക ചോദിച്ചതിന് വയോധികർക്കെതിരെ വനിതാ എസ്.ഐ. നൽകിയ പരാതിയിൽ പൊലീസ് അന്വേഷണം തുടങ്ങി. ലൈംഗിക അതിക്രമ പരാതി കൂടി ഉൾപ്പെട്ടതിനാൽ രഹസ്യമൊഴി രേഖപ്പെടുത്താനുള്ള നടപടിയിലാണ് പൊലീസ്. സംഭവത്തിൽ ഫറോക്ക് ഡിവിഷൻ അസിസ്റ്റന്റ് കമ്മിഷണർ എ.എം. സിദ്ദിഖ് രണ്ടു ദിവസത്തിനുള്ളിൽ കമ്മിഷണർക്ക് റിപ്പോർട്ട് നൽകും. കോഴിക്കോട് മെഡിക്കൽ കോളേജ് ഡിവിഷൻ അസി.കമ്മിഷണർ ഓഫിസിലെ  എസ്.ഐ.യാണ് പരാതിക്കാരി. 

പന്നിയങ്കര സ്റ്റേഷനിലാണ് വാടക കുടിശ്ശിക ചോദിച്ചതിനു വീട്ടുടമയുടെ മകളുടെ ഭർത്താവിന്റെ പേരിൽ സ്ത്രീപീഡനത്തിന് പരാതി നൽകിയത്. വീട്ടുടമകളായ വയോധികരുടെ മകളുടെ ഭർത്താവ് തന്റെ വിവാഹമോതിരം ബലമായി ഊരിയെടുത്തെന്നും അതിന്റെ വിലയായ 30000 രൂപയും വാടക വീടിന് അഡ്വാൻസ് നൽകിയ 70000 രൂപയും ഉൾപ്പെടെ ഒരു ലക്ഷം രൂപ തിരികെ നൽകണമെന്നും പരാതിയിൽ പറയുന്നു.

എന്നാൽ, വാടകക്കുടിശ്ശികയായ 1.43 ലക്ഷം രൂപ തിരികെ ചോദിച്ചതാണ് പരാതിക്ക് കാരണമെന്ന് ചൂണ്ടിക്കാട്ടി വീട്ടുടമസ്ഥരും പരാതി നൽകിയിട്ടുണ്ട്. രണ്ടു പരാതികളിലും പന്നിയങ്കര പൊലീസ് അന്വേഷണം തുടരുകയാണ്.  രഹസ്യാന്വേഷണ വിഭാഗം നടത്തിയ പ്രാഥമിക അന്വേഷണത്തിൽ വനിതാ എസ്.ഐ.യുടെ പരാതി വ്യാജമാണെന്ന് കണ്ടെത്തിയിരുന്നു. അതേസമയം വകുപ്പുതല അന്വേഷണവുമായി വനിതാ എസ്.ഐ സഹകരിക്കുന്നില്ലെന്നാണ് വിവരം.