കണ്ണൂർ : മലബാർ ദേവസ്വം ബോർഡിനുകീഴിലുള്ള ക്ഷേത്രങ്ങളിലെ ജീവനക്കാരുടെ പരിഷ്‌കരിച്ച ശമ്പളം ഈമാസം മുതൽ വിതരണംചെയ്യും. പുതുക്കിയ സ്‌കെയിലിൽ ലഭിക്കേണ്ട ക്ഷാമബത്ത പിന്നീട്‌ നൽകും. ക്ഷാമബത്ത നൽകാനുള്ള അംഗീകാരത്തിന്‌ ബോർഡ്‌ തീരുമാനമെടുത്ത്‌ സർക്കാരിന്‌ സമർപ്പിച്ചിട്ടുണ്ട്‌. സർക്കാർ അനുമതി നൽകുന്നമുറയ്‌ക്ക്‌ പുതുക്കിയ ക്ഷാമബത്ത കുടിശ്ശിക സഹിതം പിന്നീട്‌ നൽകും.

2019 ഡിസംബർ 31 വരെയുള്ള 275 ശതമാനം ക്ഷാമബത്ത അടിസ്ഥാന ശമ്പളത്തിൽ ലയിപ്പിച്ചിരുന്നു. ഇതിനൊപ്പം, 2020 ജൂലൈ ഒന്നുവരെയുള്ള ഒമ്പതു ശതമാനം ക്ഷാമബത്ത ഒക്ടോബർ മാസത്തെ ശമ്പളത്തോടൊപ്പം അനുവദിക്കും. സർക്കാർ അനുമതി ലഭിച്ചാൽ പുതുക്കിയ സ്‌കെയിലുള്ള ക്ഷാമബത്തയും നൽകും. ശമ്പള പരിഷ്‌കരണപ്രകാരമുള്ള പുതുക്കിയ അലവൻസുകൾ, മാനേജ്‌മെന്റ്‌ ഫണ്ടിൽനിന്നുള്ള ശമ്പളക്കുടിശ്ശിക അനുവദിക്കൽ എന്നിവ ശമ്പളപരിഷ്‌കരണം പ്രാബല്യത്തിൽ വന്ന 2021 ഒക്ടോബർ 10 മുതൽ നടപ്പിലാകും. 2,000 മുതൽ 3,000 രൂപവരെ വർധനയുണ്ടാകും. 1600 ഓളം ക്ഷേത്രങ്ങളിലെ ഏഴായിരത്തോളം ജീവനക്കാർക്ക്‌ ഇതിന്റെ പ്രയോജനം ലഭിക്കും.

മേൽശാന്തി, കീഴ്‌ശാന്തി, മാനേജർ, യു.ഡി. ക്ലർക്ക്‌, എൽ.ഡി. ക്ലർക്ക്‌, വാദ്യം, കഴകം, അറ്റൻഡർ, കാവൽക്കാർ, അടിച്ചുതളി, ചില ക്ഷേത്രങ്ങളിലെ വെളിച്ചപ്പാട്‌ എന്നിവർക്കാണ്‌ ശമ്പളപരിഷ്‌കരണത്തിന്റെ മെച്ചം ലഭിക്കുക. 2008ൽ രൂപീകരിച്ച മലബാർ ദേവസ്വം ബോർഡ്‌ തൊട്ടടുത്ത വർഷം ശമ്പളപരിഷ്‌കരണം നടപ്പാക്കി. സർക്കാർ ജീവക്കാരുടെ ശമ്പള വ്യവസ്ഥയ്‌ക്കനുസരിച്ചാണ്‌ ക്ഷേത്രജീവനക്കാർക്കും ശമ്പളം നിശ്‌ചയിച്ചത്‌. 2014ൽ വീണ്ടും ശമ്പള പരിഷ്‌കരണം നടപ്പാക്കാൻ ബോർഡ്‌ ശുപാർശചെയ്‌തെങ്കിലും സർക്കാർ അംഗീകരിച്ചിരുന്നില്ല.