പേരാവൂർ:വന്യമൃഗങ്ങളിൽ നിന്നും മലയോര കർഷകരുടെ ജീവനും സ്വത്തും സംരക്ഷിക്കണമെന്നും വന്യമൃഗശല്യത്തിന് ശാശ്വത പരിഹാരം കാണണമെന്നും സി.പി.എം പേരാവൂർ ഏരിയ സമ്മേളനം ആവശ്യപ്പെട്ടു. പേരാവൂരിൽ ഉന്നത വിദ്യാഭ്യാസ സ്ഥാപനം ആരംഭിക്കുക, കണ്ണൂർ വിമാനത്താവളം – വയനാട് നാലുവരിപ്പാത യാഥാർഥ്യമാക്കുക, ഇന്ധന വില കുറയ്ക്കുക, കാർഷികോൽപ്പന്നങ്ങളുടെ മൂല്യവർദ്ധിത ഉൽപ്പന്നങ്ങൾ നിർമ്മിക്കാൻ വ്യവസായ സ്ഥാപനം ആരംഭിക്കുക, ക്ഷീര വ്യവസായ മേഖലയെ സംരക്ഷിക്കുക, തൊഴിലുറപ്പ് തൊഴിലാളികളുടെ തൊഴിൽ ദിനവും കൂലിയും വർദ്ധിപ്പിക്കുക,പട്ടയമില്ലാത്ത കർഷകർക്ക് പട്ടയം അനുവദിക്കുക,ടൂറിസം സർക്യൂട്ട് നടപ്പിലാക്കുക, ആനത്താര പദ്ധതി വേഗത്തിൽ നടപ്പിലാക്കുക തുടങ്ങിയ പ്രമേയങ്ങളും അവതരിപ്പിച്ചു.

കൊട്ടിയൂർ നീണ്ടുനോക്കി എം. കണ്ണൻ നഗറിൽ രണ്ടു ദിവസമായി നടന്ന സമ്മേളനത്തിൽ 11 ലോക്കലുകളിൽ നിന്നായി 25 പ്രതിനിധികൾ ചർച്ചയിൽ പങ്കെടുത്തു. ഏരിയ കമ്മിറ്റിക്ക് വേണ്ടി എം.രാജനും മേൽക്കമ്മിറ്റിക്ക് വേണ്ടി ജില്ലാ സെക്രട്ടറി എം.വി ജയരാജനും മറുപടി പറഞ്ഞു. സംസ്ഥാന കമ്മിറ്റി അംഗം വി.ശിവദാസൻ എംപി, ജില്ലാ സെക്രട്ടറിയറ്റ് അംഗങ്ങളായ വത്സൻ പനോളി, പി. ഹരീന്ദ്രൻ, പി.പുരുഷോത്തമൻ, ജില്ലാ കമ്മിറ്റി അംഗം വി.ജി. പദ്മനാഭൻ തുടങ്ങിയവർ സംസാരിച്ചു.സി.ടി.അനീഷ് ക്രഡൻഷ്യൽ റിപ്പോർട്ട് അവതരിച്ചു. പ്രസീഡിയത്തിന് വേണ്ടി കെ സുധാരൻ നന്ദി പറഞ്ഞു.

പൊതുസമ്മേളനം എം.വി. ജയരാജൻ ഉദ്ഘാടനം ചെയ്തു. അഡ്വ. എം.രാജൻ അധ്യക്ഷനായി. സംസ്ഥാന കമ്മിറ്റി അംഗം വി ശിവദാസൻ എംപി, ജില്ലാ കമ്മിറ്റി അംഗം ടി കൃഷ്ണൻ, എം എസ് വാസുദേവൻ തുടങ്ങിയവർ സംസാരിച്ചു.