തളിപ്പറമ്പ് : പുളിമ്പറമ്പിനടുത്ത് തോട്ടാറമ്പിലെ എരമംഗലം ലോറൻസിന്റെ വീട്ടിൽ കയറി നാലംഗ സംഘം അക്രമം നടത്തി. വെട്ടേറ്റ മകൻ ജസ്റ്റിൻ ലോറൻസിനെ (34) കോ-ഓപ്പറേറ്റീവ് ഹോസ്പിറ്റലിൽ പ്രവേശിപ്പിച്ചു. 

തിങ്കളാഴ്ച പുലർച്ചെ ഒന്നോടെയായിരുന്നു സംഭവം. മുൻവാതിൽ പൊളിച്ച് അകത്തുകയറിയ സംഘം വീട്ടിനകത്തെ ഫർണിച്ചറും സാധനങ്ങളും അടിച്ചുതകർത്തു. ജനൽച്ചില്ലും ഇരുചക്രവാഹനവും തകർത്തിട്ടുണ്ട്. ജസ്റ്റിന്റെ കഴുത്തിലുൾപ്പെടെ ശരീരത്തിൽ മുറിവുകളുണ്ട്.

സമീപവാസികളെത്തിയാണ് ആസ്പത്രിയിലെത്തിച്ചത്. അക്രമികളെ തിരിച്ചറിഞ്ഞിട്ടില്ല. കഴിഞ്ഞ ദിവസം രാത്രി വെള്ളിക്കീൽ റോഡിൽ വെച്ച് മറ്റ് രണ്ടുപേരുമായി ജസ്റ്റിൻ വാക്കേറ്റമുണ്ടായിരുന്നു. അതിനിടെയുണ്ടായ അക്രമത്തിൽ പരിക്കേറ്റ ജയേഷിനെ കണ്ണൂർ മെഡിക്കൽ കോളേജ് ആസ്പത്രിയിൽ പ്രവേശിപ്പിച്ചു. ഇവർ തമ്മിലുണ്ടായ പ്രശ്നങ്ങളാണ് വീട്‌ തകർത്ത് അക്രമിക്കാനുണ്ടായ കാരണമെന്നാണ് പോലീസ് സംശയിക്കുന്നത്. ജസ്റ്റിനെ ആക്രമിച്ചതിൽ നാലാളുകളുടെ പേരിൽ വധശ്രമത്തിന് കേസെടുത്തിട്ടുണ്ട്.