കണ്ണൂർ : വംശനാശ ഭീഷണി നേരിടുന്ന അപൂർവവൃക്ഷങ്ങൾ സംരക്ഷിക്കാൻ കണ്ണൂർ സെൻട്രൽ ജയിലിൽ ട്രീ മ്യൂസിയം വരുന്നു. ഹരിത കേരളം മിഷൻ സഹകരണത്തോടെ ജയിൽ വകുപ്പ്‌ ഒരുക്കുന്ന മ്യൂസിയത്തിൽ ശലഭോദ്യാനം, കോക്കം തോട്ടം, ഊദ് തോട്ടം എന്നിവയുമുണ്ടാകും. നടീൽ ഉദ്ഘാടനം  കലക്ടർ എസ്. ചന്ദ്രശേഖർ നിർവഹിച്ചു. 

പച്ചത്തുരുത്ത് പദ്ധതിയുടെ ഭാഗമായി ഒരുക്കുന്ന മ്യൂസിയത്തിൽ ഏകനായകം-, കരിങ്ങാലി-, പലകപ്പയ്യാനി, വയന, ചമത, രുദ്രാക്ഷം-, അമ്പഴം, വന്നി, വേപ്പ്, അർബുദ നാശിനി, തിരുവട്ടക്കായ്, പാച്ചോറ്റി, വേങ്ങ, കൂവളം, കരിമരം -, തമ്പകം തുടങ്ങി അമ്പതിൽപരം വൃക്ഷത്തൈകളാണ്‌ നടുന്നത്‌. കൊങ്കൺ മേഖലയിൽ മാത്രം വളരാറുള്ള കോക്കം മരങ്ങളുടെ തോട്ടവും ട്രീ മ്യൂസിയത്തിലുണ്ടാവും.

ഫലവർഗങ്ങളിൽ കടുത്ത ചുവന്ന നിറമുള്ള കോക്കം എന്ന പഴം കാട്ടമ്പി, പുനംപുളി, പെണംപുളി, മരപ്പുളി, പിനംപുളി, പിനാർപുളി എന്നെല്ലാം അറിയപ്പെടുന്നു. കുടംപുളിയുടെ വർഗത്തിൽപെട്ട കോക്കം മലബാറിന്റെ കാലാവസ്ഥയ്‌ക്കനുസരിച്ച വിളയാണിത്. പത്ത്‌ മീറ്റർ വരെ ഉയരം വയ്ക്കുന്ന ഒരു ചെറുവൃക്ഷമാണിത്. ചവർപ്പു രസമുള്ള ഇതിന്റെ ചാറ്‌ നല്ലൊരു ദഹന രസംകൂടിയാണ്. കോകം കായയിൽനിന്ന് എണ്ണയും ഉൽപ്പാദിപ്പിക്കും. സുഗന്ധദ്രവ്യം നിർമിക്കാൻ ഉപയോഗിക്കുന്ന ഊദ് മരത്തോട്ടവും മ്യൂസിയത്തിൽ ഉണ്ടാകും.

ട്രീ മ്യൂസിയത്തിലെ ശലഭോദ്യാനത്തിൽ ചിത്രശലഭങ്ങൾക്കും നിശാശലഭങ്ങൾക്കും
ആവാസവ്യവസ്ഥ ഒരുക്കും. കറിവേപ്പും കിലുക്കിച്ചെടിയും നാരകവുമൊക്കെ പൂമ്പാറ്റകൾക്ക് ജീവിക്കാനും മുട്ടയിടാനുമുള്ള ആവാസവ്യവസ്ഥ ഉണ്ടാക്കും. ആദ്യഘട്ടമായി ഹനുമാൻ കിരീടം, ചെമ്പരത്തി, കിലുക്കിച്ചെടി, വെള്ളില, പാണൽ, നാരകം, കൂവളം, കറുവ, കറിവേപ്പ്, മുള്ളിലം, കാട്ടുനാരകം, ആറ്റുതകര, നീർമാതളം തുടങ്ങിയ ചെടികൾ നടും.