പേരാവൂർ: നവമ്പർ 2,3 തീയതികളിൽ കൊട്ടിയൂരിൽ നടക്കുന്ന പേരാവൂർ ഏരിയ സമ്മേളനത്തിനത്തിന്റെ ഒരുക്കങ്ങൾ പൂർത്തിയായതായി നേതാക്കൾ അറിയിച്ചു. സമര സംഘടനാ പ്രവർത്തനങ്ങൾക്ക് പുറമേ കാർഷിക രംഗത്തും സാന്ത്വന പരിചരണ രംഗത്തും നാടിൻ്റെ വികസന പുരോഗതിക്കുമായി മികച്ച ഇടപെടലാണ് പേരാവൂർ ഏരിയയിലെ പാർട്ടി ഇക്കാലയളവിൽ നടത്തിയതെന്ന് നേതാക്കൾ പറഞ്ഞു.

സംസ്ഥാന സർക്കാറിൻ്റെ സുഭിക്ഷ കേരളം പദ്ധതി വിജയിപ്പിക്കാനുളള പാർട്ടി തീരുമാനത്തിൻ്റെ ഭാഗമായി ഇരുനൂറ്റൻപതോളം ഹെക്ടറിൽ പാർട്ടി ബ്രാഞ്ചുകളും ലോക്കൽ കമ്മിറ്റികളും വർഗ്ഗ ബഹുജന സംഘടനകളും ചേർന്ന് കൃഷി ചെയ്തു. നിർധനരായ കുടുംബത്തിന് രണ്ടായിരം വീട് നിർമ്മിച്ച് നൽകണമെന്ന 
ഇരുപത്തിരണ്ടാം പാർട്ടി കോൺഗ്രസിൻ്റെ തീരുമാനപ്രകാരം പേരാവൂർ ഏരിയയിൽ പത്ത് വീടുകൾ നിർമ്മിച്ച് നൽകി. പതിനൊന്നാമത്തെ വീട് നിർമ്മാണ ഘട്ടത്തിലാണ്.

കൊട്ടിയൂരിലെ പ്രളയ സമയത്ത് പാർട്ടി മുൻകൈയ്യെടുത്ത് ഐ.ആർ.പി.സി, ഡി.വൈ.എഫ്.ഐ എന്നിവയുമായി സഹകരിച്ച് കൊട്ടിയൂരിൽ ഹെൽപ്പ് ഡെസ്ക്ക് ആരംഭിച്ചു. ഇത് വഴി ആയിരത്തോളം കുടുംബങ്ങൾക്ക് സൗജന്യ ഭക്ഷണ കിറ്റും മരുന്നും മറ്റു സഹായങ്ങളും പ്രളയത്തിൽ വീട്ടുപകരണങ്ങൾ നഷ്ടപ്പെട്ടവർക്ക് പുതിയ ഗൃഹോപകരണങ്ങളും എത്തിച്ചുകൊടുക്കാൻ സാധിച്ചു.

മലയോരത്തിൻ്റെ വികസന സാധ്യതകൾ മനസ്സിലാക്കി പാർട്ടിയിലെ കമ്മിറ്റി മുൻകൈയെടുത്ത് ഡോ.വി. ശിവദാസൻ എംപി യുടെ നേതൃത്വത്തിൽ മലയോര വികസന സാധ്യതകൾ ചർച്ച ചെയ്ത് പ്രത്യേക പ്ലാൻ തയ്യാറാക്കി. പുരളിമല , ഏലപ്പീടിക, പാലുകാച്ചി തുടങ്ങിയ മേഖല ഉൾപ്പെടുത്തി ടൂറിസം രംഗത്ത് വിവിധ പദ്ധതികൾ നടപ്പിലാക്കാനുള്ള പ്രാരംഭ പ്രവർത്തനങ്ങളും ആരംഭിച്ചു.

സമ്മേളന സമയത്ത് ഏരിയയിലെ ആറ് പഞ്ചായത്തുകളിൽ മൂന്ന് പഞ്ചായത്തുകളിൽ മാത്രമായിരുന്നു എൽ.ഡി.എഫിന് ഭൂരിപക്ഷം ഉണ്ടായിരുന്നത്. കഴിഞ്ഞ തദ്ദേശ തിരഞ്ഞെടുപ്പിൽ 48 വർഷത്തെ കോൺഗ്രസ് അപ്രമാദിത്വം അവസാനിപ്പിച്ച് കണിച്ചാർ പഞ്ചായത്ത് പിടിച്ചെടുക്കാനും ഭൂരിപക്ഷമില്ലാതിരുന്ന മുഴക്കുന്ന് പഞ്ചായത്തിൽ മികച്ച ഭൂരിപക്ഷം നേടാനും പാർട്ടിക്ക് സാധിച്ചു. കൊട്ടിയൂരിൽ സീറ്റ് വർദ്ധിപ്പിച്ച് ഏഴ് – ഏഴ് എന്ന നിലയിൽ തുല്യത കൈവരിക്കാനും കഴിഞ്ഞു. നറുക്കെടുപ്പിൽ പ്രസിഡണ്ട് സ്ഥാനം നഷ്ടപ്പെട്ടെങ്കിലും വൈസ് പ്രസിഡൻ്റുൾപ്പെടെ എല്ലാ സ്റ്റാൻ്റിംഗ് കമ്മിറ്റിയും എൽ.ഡി.എഫിന് ലഭിച്ചു. പേരാവൂർ ബ്ലോക്ക് പഞ്ചായത്തിലും മൂന്ന് സീറ്റ് വർദ്ധിപ്പിച്ചു.

കഴിഞ്ഞ സമ്മേളന സമയത്ത് 167 ബ്രാഞ്ചുകളുണ്ടായിരുന്നത് 184 ആയും മെമ്പർഷിപ്പ് 2179 ൽ നിന്നും 2264 ആയും വർദ്ധിപ്പിച്ചു.ഭൂമിശാസ്ത്രപരമായ പ്രയാസം, കേഡർ ക്ഷാമം തുടങ്ങിയ പ്രതിസന്ധികൾക്കിടയിലും മലയോരത്ത് മികച്ച മുന്നേറ്റമുണ്ടാക്കാൻ കഴിഞ്ഞ ആത്മ വിശ്വാസത്തിലാണ് പേരാവൂർ ഏരിയ കമ്മിറ്റി.