പേരാവൂർ: ഹൗസ് ബിൽഡിങ്ങ് സൊസൈറ്റി ചിട്ടി തട്ടിപ്പിൽ സഹകരണ വകുപ്പ് നടത്തിയ അന്വേഷണ റിപ്പോർട്ട് ജോയിന്റ് രജിസ്ട്രാർക്ക് സമർപ്പിച്ചു. അന്വേഷണത്തിൽ വ്യാപക ക്രമക്കേടുകൾ കണ്ഡെത്തിയതിനാൽ ചിട്ടി തട്ടിപ്പിൽ പോലീസ് അന്വേഷണവും സൊസൈറ്റിയുടെ ബാഗ് നിർമ്മാണ യൂണിറ്റിനെക്കുറിച്ച് വാണിജ്യവകുപ്പിന്റെ അന്വേഷണവും സഹകരണ വകുപ്പിന്റെ ഉന്നതതല അന്വേഷണവും റിപ്പോർട്ടിൽ ആവശ്യപ്പെട്ടിട്ടുണ്ട്.

ഒന്നരമാസം നീണ്ട അന്വേഷണത്തിന്റെ 38 പേജുകളടങ്ങുന്ന റിപ്പോർട്ടാണ് അന്വേഷണ സംഘം ജോയിന്റ് രജിസ്ട്രാർക്ക് ശനിയാഴ്ച സമർപ്പിച്ചത്. വ്യാജ രസീതുകളും വൗച്ചറുകളും ഹാജരാക്കി സെക്രട്ടറിനടത്തിയ ഇടപാടുകൾ, മതിയായ ഈടില്ലാതെ നല്കിയ വായ്പകൾ എന്നിവയടക്കം കോടികളുടെ ക്രമക്കേടുകൾ അന്വേഷണത്തിൽ കണ്ടെത്തിയിട്ടുണ്ട്. സൊസൈറ്റിക്ക് നഷ്ടപ്പെട്ട പണംസെക്രട്ടറി പി.വി. ഹരിദാസ്, മുൻ ഭരണസമിതി അംഗങ്ങൾ എന്നിവരിൽ നിന്ന് ഈടാക്കണമെന്നും റിപ്പോർട്ട് ആവശ്യപ്പെടുന്നു.

സഹകരണ നിയമം വകുപ്പ് 66 പ്രകാരം നടന്ന അന്വേഷണത്തിന് ഇരിട്ടി അസിസ്റ്റന്റ് രജിസ്ട്രാർ (ജനറൽ) കെ. പ്രദോഷ് കുമാർ, പേരാവൂർ യൂണിറ്റ് ഇൻസ്‌പെക്ടർ കെ. സമീറ, മട്ടന്നൂർ യൂണിറ്റ് ഇൻസ്‌പെക്ടർ ടി. രാജേഷ്‌ കുമാർ എന്നിവരാണ് നേതൃത്വം നല്കിയത്.