പയ്യന്നൂർ : കോവിഡിന്റെ ദുരിതകാലത്തിൽ ജീവിതതാളം മാറിയ തെയ്യം കലാകാരന്മാരും  പ്രതീക്ഷയിലാണ്‌. തുലാം പത്ത് ആകുന്നതോടെ അത്യുത്തര കേരളത്തിലെ തെയ്യാട്ട കാവുകൾ വീണ്ടും സജീവമാകുകയാണ്. ഇടവപ്പാതി വരെ നീളുന്ന തെയ്യക്കാലത്തിനാണ് തുടക്കമാകുന്നത്. രണ്ടു വർഷത്തെ ഇടവേളയ്‌ക്കുശേഷം മറ്റൊരു പത്താമുദയക്കാലത്ത്‌ വിവിധ സ്ഥലങ്ങളിൽ തെയ്യങ്ങൾ കെട്ടിയാടി. ഇത്തവണ തെയ്യക്കാലത്തിന് തിരിതെളിയുമ്പോൾ തെയ്യക്കാരൻ വേവലാതിയിലാണ്‌. തെയ്യച്ചമയങ്ങളൊരുക്കാൻ വലിയ ചെലവുവരും.

കൃഷിയും കന്നുപൂട്ടലും ഉപജീവനമാർഗമായിരുന്ന കാലത്തിന്റെ പ്രതീകമായ പത്താമുദയം (തുലാമാസത്തിൽ പത്താം തീയതി)  മുതലാണ്‌ മലബാറിൽ തെയ്യങ്ങളുടെ തുടക്കം. ഇടവ മാസത്തോടെ തൊഴുതുപിരിഞ്ഞ തെയ്യങ്ങൾ തുലാപ്പത്തു മുതൽ കാവുകളിൽ സജീവമാകും. തറവാടുകളും വീടുകളും അടിച്ചുതെളിച്ച് വിളക്കുവച്ച് പത്താമുദയത്തെ വരവേല്ക്കും.

പത്താമുദയത്തിൽ കൊളച്ചേരി ചാത്തമ്പള്ളി വിഷകണ്ഠൻ ക്ഷേത്രം, നീലേശ്വരം അഞ്ഞൂറ്റമ്പലം വീരർകാവ് എന്നിവിടങ്ങളിലെ കളിയാട്ടത്തോടെയാണ് വടക്കേ മലബാറിലെ തെയ്യക്കാലം തുടങ്ങുന്നത്. ഇടവപ്പാതിയിൽ (ഏകദേശം ജൂൺ 15)വളപട്ടണം  കളരിവാതുക്കൽ ഭഗവതി ക്ഷേത്രത്തിൽ  ഭഗവതിയുടെ തെയ്യം, നീലേശ്വരം മന്നൻപുറത്ത് കാവിൽ കലശം എന്നിവയോടെ കളിയാട്ടക്കാലം അവസാനിക്കും.