തിരുവനന്തപുരം : മഴക്കെടുതിയിൽ പശു, എരുമ എന്നിവ ചത്തെങ്കിൽ ഒന്നിന് 30,000 രൂപ നിരക്കിൽ കർഷകർക്ക് നഷ്ടപരിഹാരം നൽകാൻ മൃഗസംരക്ഷണ വകുപ്പ്‌ തീരുമാനിച്ചു. കിടാരിക്ക് 15,000 രൂപ, ആടിന് 3000 രൂപ, കോഴി‍ക്ക് 200 രൂപ എന്നിങ്ങനെയും നൽകാൻ മന്ത്രി ജെ. ചിഞ്ചുറാണി നിർദേശിച്ചു. ദുരന്തനിവാരണ മാനദണ്ഡപ്രകാരം ഇതുവരെ ഒരു കോഴി‍ക്ക് 50 രൂപയായിരുന്നു നഷ്ടപരിഹാരം. അതാണ് 200 ആക്കുന്നത്. 

അപേക്ഷ നൽകണം

നഷ്ടപരിഹാരത്തിനായി പഞ്ചായത്ത് മൃഗാശുപത്രികളിലെ വെറ്ററിനറി സർജനെയോ ബ്ലോ‍ക്കിലെ ക്ഷീരവികസന ഓഫിസറെയോ ബന്ധപ്പെടണം. പ്രളയബാധിത പ്രദേശങ്ങളിൽ ഉള്ളവർക്ക് അപേക്ഷ നൽകാൻ സമയം നീട്ടിനൽകിയേക്കും.

മഴക്കെടുതിയിൽ മൃഗസംരക്ഷണ മേഖലയിൽ 2 കോടി രൂപയുടെ നാശനഷ്ടം ഉണ്ടായെന്നാ ണ് കണക്ക്. 114 ക്യാംപുകളിലായി 4009 ഉരു‍ക്കൾ, 802 ആടുകൾ എന്നിവയുണ്ട്. ഇവയ്ക്കു തീറ്റ നൽകാൻ 10 ലക്ഷം രൂപ മാറ്റിവെച്ചിട്ടുണ്ട്. പശുവിനു പ്രതിദിനം 70 രൂപയും ആടിനു 35 രൂപയുമാണു നീക്കിവച്ചിരിക്കുന്നത്.