കൊട്ടിയൂർ: കർണാടകയിൽനിന്ന്‌ വഴിയോര കച്ചവടത്തിനായി മലയോരത്ത് എത്തിച്ച താറാവ് മുട്ടകൾ കൃത്രിമമാണെന്ന സംശയത്തെ തുടർന്ന് വാഹനങ്ങൾ നാട്ടുകാർ തടഞ്ഞ സംഭവത്തിൽ ആശങ്കയ്ക്ക് വകയില്ല. സാമ്പിൾ പരിശോധനയിൽ മുട്ടകൾ വ്യാജമല്ലെന്ന്‌ തെളിഞ്ഞതായി ജില്ലാ ഭക്ഷ്യസുരക്ഷാ വകുപ്പ് അസി. കമ്മിഷണർ അറിയിച്ചു.

ഞായറാഴ്ചയായിരുന്നു വ്യാജമെന്ന ധാരണയിൽ താറാവ് മുട്ടകൾ വിൽപ്പന നടത്തിയ വാഹനങ്ങൾ നാട്ടുകാർ തടഞ്ഞത്. വാഹനങ്ങൾ കേളകം പോലീസിൽ ഏൽപ്പിച്ചിരുന്നു. സംശയ നിവാരണത്തിനായി മുട്ടസാമ്പിളുകൾ പോലീസ് പരിശോധനയ്ക്ക് അയയ്ക്കുകയായിരുന്നു.

ഒന്നിന് ആറുരൂപ നിരക്കിൽ കൊട്ടിയൂർ കണ്ടപ്പുനത്ത്‌ താറാവ് മുട്ട വിൽപ്പന നടത്തിയ വാഹനമാണ് നാട്ടുകാർ ആദ്യം തടയാൻ ശ്രമിച്ചത്. ഇതേ സംഘത്തിലുള്ളവർ വില്പന നടത്തിയ ബൈക്കടക്കം മൂന്ന് വാഹനങ്ങൾ അമ്പായത്തോട്ടിലും നാട്ടുകാർ തടഞ്ഞു. മുട്ടകൾക്ക്‌ വ്യത്യാസം തോന്നിയതിനെ തുടർന്നായിരുന്നു ഇത്‌.

മുട്ടയ്ക്കുള്ളിൽ മഞ്ഞക്കരുവും വെള്ളയും തമ്മിൽ വേർതിരിവില്ല, കലങ്ങിയ ഒരു ദ്രാവകം ഒഴുകിവരുന്നു, തോടും വെള്ളയും തമ്മിൽ വേർതിരിക്കുമ്പോൾ റബ്ബർപാട പോലെ പൊതിഞ്ഞിരിക്കുന്ന ആവരണം മുട്ടയ്ക്കുള്ളിൽ കണ്ടെത്തി, പാട കത്തിച്ചാൽ പ്ലാസ്റ്റിക്കിന്റെ മണം, പച്ചമുട്ടയുടെ തോട് പുഴുങ്ങാതെ തന്നെ പൊളിക്കാനാകും എന്നിങ്ങനെ ആരോപണങ്ങളും ഉയർന്നു. തുടർന്ന് കേളകം പോലീസ് അമ്പായത്തോട്ടിലെത്തി തടഞ്ഞുവെച്ച വാഹനങ്ങൾ സ്റ്റേഷനിലേക്ക് മാറ്റിയിരുന്നു. മുട്ടകളുടെ സാമ്പിളെടുത്ത് പരിശോധനയ്ക്കായി ജില്ലാ ഭക്ഷ്യസുരക്ഷാവകുപ്പിന് കൈമാറുകയായിരുന്നു.

“കൃത്രിമമുട്ടകൾ എന്ന സംശയത്തിൽ കേളകം പോലീസ് കഴിഞ്ഞ ദിവസം മുട്ടസാമ്പിളുകൾ പരിശോധനയ്ക്കെത്തിച്ചിരുന്നു. പരിശോധനയിൽ അസ്വാഭാവികമായി ഒന്നും കണ്ടെത്താനായിട്ടില്ല. മുട്ടകൾ വ്യാജമല്ല“. എൻ.അനിൽകുമാർ (ഭക്ഷ്യസുരക്ഷാ അസി. കമ്മിഷണർ, കണ്ണൂർ).