പേരാവൂർ: എക്സൈസും കണ്ണൂർ എക്‌സൈസ് ഇന്റലിജൻസ് ടീമും സംയുക്തമായി നടത്തിയ പരിശോധനയിൽ മാലൂർ തൃക്കടാരിപൊയിൽ പനമ്പറ്റ യൂനസ് മൻസിലിൽ  മുഹമ്മദ് ഷെഫിക്ക്(19) എന്നയാളെ മാരക മയക്ക് മരുന്നായ എം. ഡി.എം.എ 2.2 ഗ്രാം സഹിതം പിടികൂടി. മുൻ മയക്ക് മരുന്ന് കേസിൽ പ്രതിയാണ് ഷെഫീക്കെന്ന് എക്സൈസ് പറഞ്ഞു. നർകോട്ടിക് നിയമപ്രകാരം 0.5 gm കൈവശം വെച്ചാൽ ജാമ്യം ലഭിക്കില്ല. പേരാവൂർ എക്സൈസ് ഇൻസ്പെക്ടർ സിനു കോയില്ലത്തിന്റെ നേതൃത്വത്തിലാണ് അറസ്റ്റ്. 

പ്രതി ഈ മേഖലകളിൽ ലഹരി വസ്തുക്കൾ വിൽപ്പന നടത്തുന്നതായി അന്വേഷണത്തിൽ കണ്ടെത്തിയതായി എക്സൈസ് അറിയിച്ചു. ഇയാളുടെ കൈവശമുണ്ടായിരുന്ന മൊബൈൽ ഫോൺ രേഖകൾ വഴി ഇയാളുമായി ബന്ധപ്പെട്ടവരിലേക്കും അന്വേഷണം നടത്തും. പിടിച്ചെടുത്ത മയക്കുമരുന്നിന് മാർക്കറ്റിൽ 30,000 രൂപയോളം വിലയുണ്ട്. 

രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിൽ കണ്ണൂർ ഇന്റലി ജൻസ് എക്സൈസ് ഇൻസ്പെക്ടർ കെ. പി. പ്രമോദ്, പ്രിവന്റീവ് ഓഫീസർ എൻ. പദ്മരാജൻ എന്നിവരുമുണ്ടായിരുന്നു. പ്രതിയെ കോടതിയിൽ ഹാജരാക്കി.