നിടുമ്പൊയിൽ(കണ്ണൂർ): സഹകരണ ആസ്പത്രി സൊസൈറ്റി വില്പന വിവാദത്തെത്തുടർന്ന് പാർട്ടി അച്ചടക്ക നടപടിക്ക് മുൻപ് വിധേയനായ സി.പി.എം മുൻ ഏരിയാ കമ്മിറ്റിയംഗവും കോളയാട് പഞ്ചായത്ത് മുൻ പ്രസിഡന്റുമായിരുന്ന കെ.പി. സുരേഷ്‌കുമാറിനെ ഒതുക്കാൻ പാർട്ടിക്കുള്ളിൽ വീണ്ടും നീക്കം. സുരേഷ്‌കുമാർ അംഗമായിട്ടുള്ള നിടുമ്പൊയിൽ ലോക്കലിലെ ഞാലിൽ ബ്രാഞ്ച് സമ്മേളനത്തിൽ നിന്നുള്ള ലോക്കൽ സമ്മേളന പ്രതിനിധികളിൽ സുരേഷിനെ ഉൾപ്പെടുത്താത്തതാണ് വിവാദമാവുന്നത്. 

സെപ്തംബർ 22ന് നടന്നബ്രാഞ്ച് സമ്മേളനത്തിൽ പേരാവൂർ ഏരിയാ കമ്മിറ്റിയംഗം കെ. ശശീന്ദ്രൻ, നിടുമ്പൊയിൽ ലോക്കൽ സെക്രട്ടറി കെ. പ്രിയൻ, ലോക്കൽ കമ്മിറ്റിയംഗം വി.ജി. രാജീവൻ എന്നിവർ മേൽ ഘടകത്തെ പ്രതിനിധീകരിച്ച് പങ്കെടുത്തിരുന്നു.

ബ്രാഞ്ചിൽ നിന്ന് ലോക്കൽ സമ്മേളനത്തിൽ പങ്കെടുക്കേണ്ട പ്രതിനിധികളെ തിരഞ്ഞെടുത്തപ്പോൾ സുരേഷ്‌കുമാറിനെ മന:പൂർവ്വം ഒഴിവാക്കിയതാണ് വിവാദമായത്. പാർട്ടി നടപടിക്ക് വിധേയനായ വ്യക്തിയെ ലോക്കൽ സമ്മേളനത്തിൽ പങ്കെടുപ്പിക്കേണ്ടതില്ലെന്ന്മേൽ ഘടകത്തെ പ്രതിനിധീകരിച്ച ഒരംഗം അഭിപ്രായപ്പെട്ടതും വിവാദമായി. സുരേഷിനെ ഒഴിവാക്കി അഞ്ച് പേരെ ലോക്കൽ സമ്മേളന പ്രതിനിധികളായി തിരഞ്ഞെടുക്കുകയും ചെയ്തു. സംഭവം വിവാദമായതോടെ പിന്നീട് അടിയന്തര ബ്രാഞ്ച് യോഗം ചേരുകയും സുരേഷ്‌കുമാറിനെ ലോക്കൽ സമ്മേളനത്തിനുള്ള പ്രത്യേക ക്ഷണിതാവായി തിരഞ്ഞെടുക്കുകയും ചെയ്തിട്ടുണ്ട്.

സഹകരണ ആസ്പത്രി വില്പന വിവാദത്തിൽ ആരോപണ വിധേയരായ നേതാക്കളിൽ പലരെയും അച്ചടക്ക നടപടികളിൽ നിന്ന് ഒഴിവാക്കിയിരുന്നു. അക്കാലത്ത് ആസ്പത്രി സൊസൈറ്റിയുടെ പ്രസിഡന്റ് ചുമതല വഹിച്ചിരുന്നുവെന്ന കാരണത്തിൽ സുരേഷ്‌കുമാറിനെ മാത്രം അച്ചടക്ക നടപടിക്ക് വിധേയനാക്കിയത് പാർട്ടിക്കുള്ളിൽ വലിയ വിവാദമാവുകയും ചെയ്തിരുന്നു.

ജനകീയനും പാർട്ടി അണികൾക്കിടയിൽ സ്വാധീനവുമുള്ള സുരേഷിനെ ഒതുക്കാൻ ഗൂഡശ്രമം നടന്നുവെന്നാണ് അണികൾക്കിടയിലെ വികാരം.കർഷക സംഘം പേരാവൂർ ഏരിയാ പ്രസിഡന്റായ സുരേഷ്, പാർട്ടിയുടെ മേൽ ഘടകത്തിലെത്തുന്നത് തടയാൻ ചിലർ നടത്തിയ ശ്രമങ്ങൾ സി.പി.എം പേരാവൂർ ഏരിയാ കമ്മിറ്റിയംഗങ്ങൾക്കിടയിലും ഭിന്നാഭിപ്രായങ്ങൾക്കിടയാക്കിയിട്ടുണ്ട്.

സുരേഷിനെ മുൻപ് പാർട്ടി സ്ഥാനങ്ങളിൽ നിന്ന് തരം താഴ്ത്തിയതും കോളയാട് പഞ്ചായത്ത് പ്രസിഡന്റ് സ്ഥാനത്ത് നിന്ന് ഒഴിവാക്കിയതും പാർട്ടി അണികൾക്കിടയിൽ പ്രതിഷേധത്തിന് കാരണമായിരുന്നു.കോളയാട്,വായന്നൂർ പ്രദേശങ്ങളിൽ നിന്ന് നിരവധി പാർട്ടി അനുഭാവികളും അംഗങ്ങളും സി.പി.എം വിട്ട് സി.പി.ഐയിൽ ചേർന്നതും ഇക്കാരണത്താലായിരുന്നു.