കണ്ണൂർ : കോളയാട് എടയാറിലെ മലബാർ സ്റ്റോൺ ക്രഷർ ഉടമ മാടത്തിനാമറ്റത്തിൽ എം. എം. തോമസിനും കൂട്ടാളി കണ്ണൂരിലെ ചാർട്ടേഡ് അകൗണ്ടൻറ് സി. സുരേഷ് കുമാറിനുമെതിരെ പരാതിയുമായി മറ്റൊരു ക്രഷർ ഉടമ രംഗത്ത്.കൊളച്ചേരി എ. കെ. ആർ ക്രഷർ യൂണിറ്റ് ഉടമയും മയ്യിൽ സ്വദേശിയുമായ എ. കെ. രാജഗോപാലാണ് തോമസും സുരേഷ്‌കുമാറും കൂടി കോടികൾ വഞ്ചിച്ചെന്ന പരാതിയുമായി കണ്ണൂർ ജില്ലാ പോലീസ് സൂപ്രണ്ടിനെ സമീപിച്ചത്.

പരാതിക്കാരന്റെ ഉടമസ്ഥതയിലുള്ള എ.കെ.ആർ ക്രഷർ യൂണിറ്റ് 2016-ൽ തോമസിന് വാടകക്ക് കൊടുത്തിരുന്നു.പതിനഞ്ച് ലക്ഷം രൂപ സെക്യൂരിറ്റി ഡെപ്പോസിറ്റും മാസം 13000 രൂപ വാടകയും നിശ്ചയിച്ചു .ഇതിൽ പത്ത് ലക്ഷം രൂപ തോമസ് നൽകി.വാടക കൃത്യമായി നൽകാത്തതിനാലും സെക്യൂരിറ്റി തുകയിൽ അഞ്ച് ലക്ഷം കിട്ടാത്തതിനാലും രാജശേഖരൻ പോലീസിൽ പരാതി നൽകിയെങ്കിലും പ്രതി വാടക കൃത്യമായി നൽകാമെന്ന് സമ്മതിച്ചിരുന്നു. എന്നാൽ, ബാക്കി സെക്യൂരിറ്റി തുക
അഞ്ച് ലക്ഷം രൂപ നൽകിയില്ല.

പരാതിക്കാരന്റെ പേരിൽ ക്രഷർ യൂണിറ്റിന്റെ ആവശ്യത്തിനായി ഫെഡറൽ ബാങ്കിലെ മയ്യിൽ ബ്രാഞ്ചിൽ അക്കൗണ്ട് എടുക്കുകയും ദുരുപയോഗം ചെയ്ത് അതിൽ വന്ന ബാധ്യതകൾ പരാതിക്കാരന്റെ പേരിലാക്കുകയും ചെയ്തു.തോമസിന്റെ തട്ടിപ്പിന് രണ്ടാം പ്രതി സുരേഷ്‌കുമാർ കൂട്ടുനിൽക്കുകയും വർഷം 25 മുതൽ 30 ലക്ഷം വരെ നഷ്ടം എന്ന രീതിയിൽ ഇൻകം ടാക്സ് റിട്ടേൺസ് പരാതിക്കാരന്റെ പേരിൽ സമർപ്പിച്ചുവെന്നും പരാതിയിൽ പറയുന്നു.തോമസിനെ സ്ഥാപനത്തിൽ നിന്ന് ഒഴിവാക്കി തിരിച്ച് പിടിക്കുന്നതിനു വേണ്ടി നോട്ടീസ് അയച്ചപ്പോൾ പരാതിക്കാരന്റെ സ്ഥാപനമായ എ.കെ. ആർ അഞ്ച് കോടിയിലധികം തോമസിന് നൽകാനുണ്ടെന്നും ആയതിന് എ.കെ.ആർ ക്രഷർ യൂണിറ്റും സ്ഥലവും പരാതിക്കാരനും ബാധ്യസ്ഥനാണെന്ന് വ്യാജ രേഖകൾ ഉണ്ടാക്കിയെന്നും പരാതിയിലുണ്ട്.

പ്രതികൾ ഇത്തരത്തിൽ കൂട്ടായി പല കള്ളരേഖകളും ഉണ്ടാക്കി പല ക്രഷറുകളും വഞ്ചന ചെയ്ത് സ്വന്തമാക്കി ഉപയോഗിക്കാറുണ്ടെന്നും ക്രഷർ യൂണിറ്റുകൾ നടത്തിപ്പ് എന്ന രീതിയിൽ എഗ്രിമെന്റ് എഴുതി കൈവശപ്പെടുത്തി കള്ള രേഖകൾ ഉണ്ടാക്കി വഞ്ചിക്കുകയാണ് ഇരുവരുടെയും പതിവെന്നും പരാതിയിൽ പറയുന്നു.അഞ്ച് കോടിയിലധികം രൂപ രേഖ പ്രകാരം കടം വരുത്തി വഞ്ചിക്കണമെന്ന ഉദ്ദേശത്തോടു കൂടിയാണ് തോമസും സുരേഷ് കുമാറും പ്രവർത്തിച്ചതെന്നും പ്രതികൾക്കെതിരെ കർശന നിയമ നടപടികൾ സ്വീകരിക്കണമെന്നും രാജാഗോപാൽ പരാതിയിൽ ആവശ്യപ്പെട്ടു.