പേരാവൂർ :പരിസരമലിനീകരണവും ഗുരുതരമായ പാരിസ്ഥിതികപ്രശ്നങ്ങളും സൃഷ്ടിക്കുന്ന കോഴിയിറച്ചിക്കടകൾ കർശനമായി നിരോധിച്ച് കേരളാ ശുചിത്വ മിഷന്റെ ഉത്തരവിറങ്ങി. നടപ്പാക്കേണ്ട ചുമതല തദ്ദേശസ്ഥാപനങ്ങൾക്കാണ്. ലൈസൻസില്ലാതെ പ്രവർത്തിക്കുന്ന കടക്കാർക്ക് വ്യവസ്ഥകൾ പാലിച്ച് ലൈസൻസെടുക്കാൻ അവസരമുണ്ട്.

കോഴിമാലിന്യം വഴിയരികിൽ തള്ളുന്നത് ഗുരുതരമായ പാരിസ്ഥിതികപ്രശ്നങ്ങൾക്ക് വഴിയൊരുക്കുന്നുണ്ടെന്നും ഇത് കർശനമായി തടയാൻ ശുചിത്വ മിഷൻ പുറത്തിറക്കിയ മാർഗനിർദേശങ്ങൾ പാലിക്കണമെന്നും ഉത്തരവിൽ പറയുന്നു.

കേരള ഹരിതകേരള മിഷൻ നടത്തിയ പഠനത്തിൽ കണ്ണൂർ ജില്ലയിൽ 1846 കോഴിയിറച്ചിക്കടകളുണ്ടെന്ന് കണ്ടെത്തിയിരുന്നു. 834 എണ്ണത്തിനേ ലൈസൻസ് ഉള്ളൂ. ഇവർക്കുപോലും മാലിന്യസംസ്കരണത്തിന് ശരിയായ മാർഗങ്ങളി​െല്ലന്നും കണ്ടെത്തി. കോഴിമാലിന്യം സംസ്കരിച്ച് വളമാക്കുന്ന പ്ലാന്റുകൾ പാപ്പിനിശ്ശേരിയിലും മട്ടന്നൂരിലും ഉണ്ടെങ്കിലും ആവശ്യത്തിന് മാലിന്യം കിട്ടുന്നില്ലെന്നാണ് ഇവരുടെ പരാതി.

അവിടെയെത്തിക്കാനുള്ള ചെലവ്‌ കാരണം പൊതുസ്ഥലങ്ങളിലും ജലാശയങ്ങളിലും തള്ളുകയാണ് ചില കോഴിക്കടക്കാർ.

സംസ്ഥാനത്ത് പ്രതിദിനം 1500 മെട്രിക് ടൺ കോഴിമാലിന്യം ഉണ്ടാകുന്നുവെന്നാണ് കണക്ക്. 1000 ടണ്ണിലധികം മാലിന്യം സംസ്കരിക്കാൻ പ്ലാന്റുണ്ടെങ്കിലും അവിടേക്ക് എത്തുന്നില്ല.

കോഴിക്കടകൾക്ക് ലൈസൻസ് പുതുക്കണമെങ്കിൽ സംസ്കരണപ്ലാന്റുകൾക്ക് മാലിന്യം കൊടുക്കണമെന്ന് മലിനീകരണനിയന്ത്രണ ബോർഡ് പുറത്തിറക്കിയ മാർഗരേഖയിലുണ്ട്.

ഒരു ജില്ലയിൽനിന്ന് മറ്റൊരു ജില്ലയിലേക്ക് മാലിന്യം കൊണ്ടുപോകരുത്. എന്നാൽ, ഇത്തരം കാര്യങ്ങൾ നടപ്പാക്കാൻ തദ്ദേശ സ്വയംഭരണസ്ഥാപനങ്ങളും താത്‌പര്യം കാണിക്കുന്നില്ലെന്ന പരാതി ഉയർന്നിരുന്നു.

ശുചിത്വ മിഷന്റെ മാർഗനിർദേശങ്ങൾ
• കോഴിക്കടകൾക്ക് ലൈസൻസ് ലഭിക്കാൻ സംസ്കരണപ്ലാന്റുമായുള്ള ധാരണാപത്രം ഹാജരാക്കണം.

• ഭക്ഷ്യസുരക്ഷാവകുപ്പിന്റെ മാനദണ്ഡങ്ങൾ പാലിക്കണം.

• ഇറച്ചിവെട്ടുന്നതിന് മരക്കുറ്റി അനുവദിക്കില്ല. പകരം ഇറച്ചിവെട്ട് യന്ത്രമോ മാർബിളോ ഫൈബർകുറ്റിയോ ഉപയോഗിക്കണം.

• ഈച്ച വരാതിരിക്കാൻ നെറ്റുകൊണ്ട് കട സംരക്ഷിക്കണം.

• ജീവനക്കാർ ആറുമാസത്തിലൊരിക്കൽ ആരോഗ്യപരിശോധനയ്ക്ക് വിധേയമാകണം.

• മലിനജലം സംസ്കരിക്കാൻ സെപ്റ്റിക് ടാങ്കുകൾ, സോക്ക്പിറ്റുകൾ എന്നിവ പണിയണം.

• പ്രതിദിനം കൊല്ലുന്ന കോഴികളുടെ എണ്ണം, മാലിന്യത്തിന്റെ അളവ് എന്നിവ രജിസ്റ്ററിൽ എഴുതിസൂക്ഷിക്കണം.

• തറയും ചുമരും ടൈൽ പതിക്കണം. ഭക്ഷ്യസുരക്ഷാവകുപ്പ് ഇടയ്ക്കിടെ പരിശോധിക്കണം.

• ഭക്ഷ്യസുരക്ഷാവകുപ്പിന്റെ അനുമതിയില്ലാത്ത കടകളിൽനിന്ന് ഹോട്ടലുകാർ ഇറച്ചി വാങ്ങരുത്.