പേരാവൂർ: പേരാവൂർ ഹൗസ് ബിൽഡിങ്ങ് സൊസൈറ്റിയിലെ നിക്ഷേപകർക്കെല്ലാം മുഴുവൻ പണവും ലഭ്യമാക്കും വരെ സി.പി.എം കൂടെ ഉണ്ടാവുമെന്ന് പേരാവൂർ ഏരിയാ കമ്മിറ്റി ഭാരവാഹികൾ പത്രസമ്മേളനത്തിൽ അറിയിച്ചു. സൊസൈറ്റി ഭരണസമിതിക്കും ജീവനക്കാർക്കുമുണ്ടായ ജാഗ്രതക്കുറവിന്റെ ഉത്തരവാദിത്വം പാർട്ടി ഏറ്റെടുക്കും. ജനങ്ങൾ അധ്വാനിച്ചുണ്ടാക്കിയ പണം നഷ്ടപ്പെടാൻ പാടില്ലെന്നാണ് സി.പി.എം.നിലപാടെന്നും നേതാക്കൾ പറഞ്ഞു.

സംഘത്തിന് ലഭിക്കേണ്ട കുടിശിക പിരിച്ചെടുത്തും ആസ്തികൾ വിറ്റും ബന്ധപ്പെട്ടവരിൽ നിന്ന് ഈടാക്കിയും മുഴുവൻ നിക്ഷേപകർക്കും പണം ലഭ്യമാക്കും. നിക്ഷേപകർക്ക് പണം ലഭ്യമാക്കുന്നതിനു മുന്നോടിയായി ആർബിറ്റേഷൻ നടപടികൾ ആരംഭിച്ചിട്ടുണ്ട്. സഹകരണ വകുപ്പിന്റെ അന്വേഷണവും നടക്കുന്നുണ്ട്.

രാഷ്ട്രീയ വിരോധം കൊണ്ട് സി.പി.എം ഭരിക്കുന്ന സഹകരണ സ്ഥാപനങ്ങളിലെല്ലാം അഴിമതിയാണെന്ന വ്യാജ പ്രചാരണമാണ് യു.ഡി.എഫ്. നടത്തുന്നത്. പേരാവൂർ ഹോസ്പിറ്റൽ സൊസൈറ്റിയിൽ നിക്ഷേപകർക്ക് ഒരു രൂപയുടെ പോലും നഷ്ടമുണ്ടായില്ലെങ്കിലും ചുമതല നിർവ്വഹിക്കുന്നതിൽ വീഴ്ച്ച വരുത്തിയവരുടെ പേരിൽ ശക്തമായ നടപടി പാർട്ടി സ്വീകരിച്ചിട്ടുണ്ട്. കൊളക്കാട് സർവ്വീസ് സഹകരണ ബാങ്കിലെ ജീവനക്കാരന്റെ ഭാഗത്തുനിന്നും തെറ്റായ നടപടിയുണ്ടായപ്പോൾ ബാങ്കിനോ നിക്ഷേപകർക്കോ യാതൊരു നഷ്ടവും ഉണ്ടായില്ലെങ്കിലും ശക്തമായ നടപടി സ്വീകരിച്ച് ജോലിയിൽനിന്നും അയാളെ ഒഴിവാക്കുന്ന സമീപനമാണ് പാർട്ടി സ്വീകരിച്ചത്.

കോൺഗ്രസ്സ് ഭരിക്കുന്ന പൂളക്കുറ്റി സർവ്വീസ് സഹകരണ ബാങ്കിലെ നിക്ഷേപകർക്ക് മൂന്നരക്കോടിയിലധികം രൂപ നഷ്ടപ്പെട്ടിട്ട് വർഷങ്ങളായെങ്കിലും അത് നൽകുന്നതിനുള്ള ഒരു നടപടിയും കോൺഗ്രസ് സ്വീകരിച്ചിട്ടില്ല. തൊണ്ടിയിൽ വനിത സഹകരണ സംഘത്തിലേയും കോടിക്കണക്കിന് രൂപ നിക്ഷേപകർക്ക് ഇനിയും ലഭിക്കാനുണ്ട്. ഇതെല്ലാം മറച്ച് വെക്കാനാണ് കോൺഗ്രസ് ഹൗസ് ബിൽഡിംഗ് സൊസൈറ്റിക്ക് മുന്നിൽ സമര നാടകവുമായി എത്തിയത്. വളപട്ടണം സഹകരണ ബാങ്കിലെയും എ.ആർ.നഗർ ബാങ്കിലെയും അഴിമതിയിൽ പണം നഷ്ടപ്പെട്ട നിക്ഷേപകർക്ക് പണം ലഭ്യമാക്കാത്ത ലീഗിന്റെ സമരവും ജനങ്ങൾ പുഛിച്ച് തള്ളും.

ഹൗസ് ബിൽഡിങ്ങ് സൊസൈറ്റിയിലെ നിക്ഷേപകർക്കൊപ്പം സി.പി.എം നിൽക്കുന്നതുപോലെതന്നെ പൂളക്കുറ്റിയിലെയും തൊണ്ടിയിൽ വനിത സംഘത്തിലെയും നിക്ഷേപകർക്ക് പണം ലഭ്യമാക്കാൻ കോൺഗ്രസ് മുൻകൈ എടുക്കണമെന്നും സി.പി.എം പേരാവൂർ ഏരിയ സെക്രട്ടറി അഡ്വ.എം രാജൻ, ഏരിയാ കമ്മിറ്റിയംഗങ്ങളായ കെ.സുധാകരൻ, കെ. ശശീന്ദ്രൻ, ടി. വിജയൻ എന്നിവർ പത്രസമ്മേളനത്തിൽ പറഞ്ഞു.