പേരാവൂർ: ഹൗസ് ബിൽഡിംഗ് സൊസൈറ്റി രാത്രിയിൽ തുറന്ന് ഫയലുകൾ കടത്തിക്കൊണ്ടു പോകാൻ ശ്രമിച്ച സെക്രട്ടറി പി.വി.ഹരിദാസിനെതിരെ ഭരണസമിതി പോലീസിൽ പരാതി നല്കി.ഫയലുകൾ കടത്തുന്നതിനിടെ സെക്രട്ടറിയെ പോലീസ് പിടികൂടിയെങ്കിലും കേസെടുക്കാതെ വിട്ടയച്ചത് വിവാദമായിരുന്നു.ഇതിനെതിരെ സി.പി.എം. ജില്ലാ സെക്രട്ടറി എം.വി.ജയരാജനും പരസ്യ പ്രസ്താവന നടത്തിയിരുന്നു.

തിങ്കളാഴ്ച സെക്രട്ടറിയെ അന്വേഷിച്ച് പോലീസും സൊസൈറ്റി പ്രസിഡന്റുംസെക്രട്ടറിയുടെ വീട്ടിൽ ചെന്നെങ്കിലും വീടു പൂട്ടി സെക്രട്ടറി കടന്നതായാണ് വിവരം.സൊസൈറ്റിയിലെ ലോക്കറിന്റെയും അലമാരയുടെയും താക്കോലുകൾ സെക്രട്ടറിയുടെ കൈവശമാണെന്നും ഇവ തിരിച്ചു വാങ്ങിത്തരണമെന്നും കാണിച്ച് ഭരണസമിതി പ്രത്യേകം പരാതി പോലീസിൽ നല്കിയിട്ടുണ്ട്.

സഹകരണ വകുപ്പധികൃതർ പരിശോധന നടത്തി

തിങ്കലാഴ്ച സൊസൈറ്റിയിൽ ജില്ലാ ജോയിന്റ് രജിസ്ട്രാറും അസിസ്റ്റന്റ് രജിസ്ട്രാറുമെത്തി പരിശോധന നടത്തി.വരും ദിവസങ്ങളിൽ വ്യാപക പരിശോധന നടത്താനും ക്രമക്കേടുകളുടെ വ്യ്പാതി തിട്ടപ്പെടുത്താനുമാണ് സഹകരണവകുപ്പധികൃതരുടെ ശ്രമം.

ഇടപാടുകാർ ഭീഷണിപ്പെടുത്തി എഗ്രിമെന്റ് ഒപ്പീടിച്ചതായി സെക്രട്ടറിയുടെ പരാതി

സഹകരണ ഹൗസ് ബിൽഡിങ്ങ് സൊസൈറ്റിയിൽ നടന്ന ചിട്ടിത്തട്ടിപ്പുമായി ബന്ധപ്പെട്ട് ഇടപാടുകാരുടെ പ്രതിനിധികൾ ഭീഷണിപ്പെടുത്തി എഗ്രിമെന്റ് ഒപ്പീടിച്ചതായി സെക്രട്ടറിയുടെ പരാതി.ഇത് സംബന്ധിച്ച് സെക്രട്ട്രി പി.വി.ഹരിദാസ് പേരാവൂർ പോലീസിൽ പരാതി നല്കി.രാത്രിയിൽ ഫയലുകൾ കടത്താൻ ശ്രമിക്കവെ പോലീസ് പിടിയിലായ ദിവസമാണ് ഇടപാടുകാർക്കെതിരെ സെക്രട്ടറി പോലീസിൽ പരാതി നല്കിയത്.

അതേസമയം,ചിട്ടിത്തട്ടിപ്പിൽ നിയമനടപടിയാവശ്യപ്പെട്ട് സെക്രട്ടറിയുടെ വീട്ടുപടിക്കൽ ഏകദിന സത്യഗ്രഹം നടത്തുമെന്ന് ഇടപാടുകാരുടെ കൂട്ടായ്മ അറിയിച്ചു.വരും ദിവസം കർമ്മസമിതി രൂപവത്ക്കരിച്ച് സമരപരിപാടികൾക്ക് നേതൃത്വം നല്കുമെന്നും ഇടപാടുകാർ പറഞ്ഞു.