മയ്യിൽ : വൈദ്യുതി ലൈനിൽനിന്ന്‌ ഷോക്കേറ്റുവീണ രണ്ട് ജീവനുകൾക്ക് രക്ഷകയായി കുഞ്ഞാമിന. പലചരക്കുകടയിൽനിന്ന് സാധനങ്ങൾ അടുക്കിവയ്‌ക്കുന്നതിനിടെ കൊളച്ചേരി പ്രതിഭാ ക്ലബ്ബിന് സമീപത്തെ കുഞ്ഞാമിന അടുത്ത വീട്ടിൽനിന്ന്‌ നിലവിളി കേട്ടത്. ഓടിച്ചെന്നപ്പോൾ കണ്ടത് ഇരുമ്പ് കമ്പി വൈദ്യുതി ലൈനിൽ തട്ടി ഷോക്കേറ്റ നിലയിൽ സ്ത്രീയും തൊട്ടടുത്ത് വീണുകിടക്കുന്ന അവരുടെ ഭർത്താവിനെയും. ഒരുനിമിഷം പകച്ചുപോയെങ്കിലും കുഞ്ഞാമിന ആത്മധൈര്യം കൈവിട്ടില്ല. കടയിലുണ്ടായിരുന്ന മരപട്ടിക ഉപയോഗിച്ച്‌ വൈദ്യുതി ലൈനിൽനിന്നും ഇരുവരെയും മോചിപ്പിച്ചു. തുടർന്ന്‌ ഭർത്താവ് നൗഷാദിന്റെ സഹായത്തോടെ ഇരുവർക്കും പ്രഥമ ശുശ്രൂഷ നൽകി ആശുപത്രിയിലെത്തിച്ചു.

ശനിയാഴ്ച രാവിലെ 9.15 ഓടെ ഇരുമ്പ് കമ്പിയുപയോഗിച്ച് വീട്ടുവളപ്പിൽനിന്ന്‌ തേങ്ങ പറിക്കുന്നതിനിടെയാണ് ഗീതയ്‌ക്ക് വൈദ്യുതി ലൈനിൽ തട്ടി ഷോക്കേറ്റത്. രക്ഷിക്കാൻ ശ്രമിച്ച ഭർത്താവ് സുരേഷും ഷോക്കേറ്റ്‌ വീണു. കുഞ്ഞാമിനയും നൗഷാദും കടൂരിലെ സി.പി.എം. പ്രവർത്തകൻ സൈനുദീനും ചേർന്നാണ് ഇരുവരെയും ആശുപത്രിയിൽ എത്തിച്ചത്‌. രണ്ടുപേരുടെ ജീവൻ രക്ഷിച്ച കുഞ്ഞാമിനയെയും നൗഷാദിനെയും സൈനുദിനെയും ഡിവൈഎഫ്ഐ ആദരിച്ചു. ജില്ലാ കമ്മിറ്റി അംഗം സി. രജുകുമാർ ഉപഹാരം നൽകി.