ഇരിട്ടി: അന്തർസംസ്ഥാന യാത്രകൾക്കും മറ്റും കേന്ദ്രസർക്കാരിന്റെ പുതുക്കിയ മാർഗ്ഗ നിർദ്ദേശം വന്നെങ്കിലും കേരളത്തിൽ നിന്നും കുടകിലേക്കുള്ള യാത്രക്കാർക്ക് ഇളവ് നൽകാതെ കുടക് ജില്ലാ ഭരണകൂടം. മൂന്നാഴ്ചയോളമായി തുടരുന്ന വാരാന്ത്യ ലോക്ക് ഡൗൺ തുടരുന്നതോടൊപ്പം നിയന്ത്രണങ്ങളും അതേപടി തുടരുന്ന അവസ്ഥയാണ്. രണ്ട് ഡോസ് വാക്‌സിൻ എടുത്തവർക്ക് ആർ.ടി.പി.സി.ആർ. പരിശോധന നടത്താതെ തന്നെ രാജ്യത്തെവിടേയും യാത്ര ചെയ്യാമെന്നതായിരുന്നു കേന്ദ്ര സർക്കാറിന്റെ പുതിയ മാർഗ്ഗ നിർദ്ദേശം. മാർഗ്ഗനിർദ്ദേശം വന്നിട്ടും കുടക് ജില്ലാ ഭരണകൂടം ശനിയാഴ്ച്ച ഇത് നടപ്പിലാക്കാൻ തയ്യാറായില്ല. പുതിയ മാർഗ്ഗ നിർദ്ദേശം വന്നതിനെത്തുടർന്ന് ശനിയാഴ്ച മാക്കൂട്ടം ചുരം പാത വഴി കർണ്ണാടകത്തിലേക്ക് പോകാനായി നൂറുകണക്കിന് യാത്രക്കാരാണ് അതിർത്തി ചെക്ക്‌പോസ്റ്റിൽ എത്തിയത്. ഇവരെ ശനി , ഞായർ വഴി കർണ്ണാടകത്തിലേക്കുമുള്ള എല്ലാ ബസ് സർവ്വീസുകളും 30 വരെ നിരോധിച്ചിരിക്കുകയാണ്. കേന്ദ്ര സർക്കാറിന്റെ പുതിയ ഉത്തരവിന്റെ അടിസ്ഥാനത്തിൽ ബസ് സർവ്വീസിനും അനുമതി ലഭിച്ചിട്ടില്ല.

എന്നാൽ അത്യാഹിതം സംഭവിച്ച് അതിർത്തി കടന്ന് ആസ്പത്രികളിൽ എത്തേണ്ടവർക്കും മാരക രോഗങ്ങൾക്ക് ചികിത്സ നേടുന്നവർക്കും നിയന്ത്രണങ്ങളിൽ ചെറിയ ഇളവ് അനുവദിച്ചിട്ടുണ്ട് . ഇത്തരം യാത്രക്കാർക്കും അവർക്കൊപ്പം ഉള്ളവർക്കും ചെക്ക് പോസ്റ്റിൽ തന്നെ ആന്റിജൻ പരിശോധനയ്ക്കുള്ള സംവിധാനം ഉണ്ടായിരുന്നു. ഇത്തരക്കാരുടെ പരിശോധനാ ഫലം ചെക്ക് പോസ്റ്റിൽ വെച്ച് ബന്ധപ്പെട്ടവരെ അറിയിക്കുന്നതിനുള്ള സംവിധാനവും ഉണ്ട്. ബംഗളൂരു വിമാനത്താവളം വഴി യാത്ര ചെയ്യേണ്ടവർക്ക് ആർ ടി പി സി ആർ സർട്ടിഫിക്കറ്റ് ഉണ്ടെങ്കിൽ യാത്രാ ടിക്കറ്റ് കാണിച്ചാൽ അനുമതി നൽകുന്നുണ്ട്. പരിക്ഷയുള്ള വിദ്യാർത്ഥികൾക്ക് ഹാൾടിക്കറ്റ് കാണിച്ചും യാത്ര ചെയ്യാനുള്ള അനുമതി നൽകിയിട്ടുണ്ട്. എന്നാൽ വിദ്യാർത്ഥികൾക്ക് പരീക്ഷയൊഴികെ മറ്റ് ആവശ്യങ്ങൾക്കൊന്നും അനുമതി നൽകുന്നുമില്ല. 

കുടകിൽ വിവിധ തൊഴിലുകൾ ഏർപ്പെട്ടിരിക്കുന്ന തൊഴിലാളികളും വ്യാപാരികളും ബംഗളൂരു മൈസൂരു ഭാഗങ്ങളിലേക്ക് പോകേണ്ടവരുമാണ് ഇവിടുത്തെ കടുത്ത നിയന്ത്രണം മൂലം കഷ്ടത്തിലായിരിക്കുന്നതു. കേന്ദ്ര സർക്കാറിന്റെ പുതിയ യാത്ര മാർഗ്ഗ നിർദ്ദേശ പ്രകാരം ചുരം പാത വഴിയുള്ള യാത്രക്ക് അനുമതി നൽകണമെന്ന ആവശ്യം വിവിധ കേണുകളിൽ നിന്നും ശക്തമായി ഉയരുകയാണ്.