കൊല്ലം: വഴികളും നടപ്പാതകളും കൈയേറിയുള്ള അനധികൃത നിർമ്മിതികൾ ഒഴിപ്പിക്കാൻ തദ്ദേശ സ്വയംഭരണ സ്ഥാപനങ്ങൾക്ക് സർക്കാർ നിർദേശംനൽകി. ഹൈക്കോടതിയുടെ ഇടക്കാല ഉത്തരവിനെത്തുടർന്നാണിത്. പൊതുസ്ഥലങ്ങളിലും വഴിയോരങ്ങളിലും പ്രതിമ സ്ഥാപിക്കുന്നതിനോ മറ്റേതെങ്കിലും തരത്തിലുള്ള നിർമ്മാണത്തിനോ അനുമതി നൽകരുതെന്നും നിർദേശിച്ചിട്ടുണ്ട്. 

ഹൈമാസ്റ്റ്‌ ലൈറ്റോ തെരുവുവിളക്കോ സ്ഥാപിക്കുന്നതിനോ വൈദ്യുതീകരണത്തിനോ ഗതാഗതസൗകര്യം മെച്ചപ്പെടുത്തുന്നതിനോ വേണ്ടിയുള്ള നിർമ്മാണങ്ങൾക്കു മാത്രമേ അനുമതി നൽകാവൂ. തെരുവുകൾ, റോഡുകൾ, ഹൈവേ മുതലായവയുടെ വികസനത്തിനും സൗന്ദര്യവത്കരണത്തിനുമായി ബന്ധപ്പെട്ട പ്രവർത്തനങ്ങളും അനുവദിക്കാം. വഴിയോ കാൽനടയാത്രയോ തടസ്സപ്പെടുത്തുന്നത് തടയണം.

പൊതുസ്ഥലങ്ങളിലെ കൈയേറ്റം തടയാൻ പഞ്ചായത്ത് രാജ് ആക്ടിലും മുനിസിപ്പൽ ആക്ടിലും വ്യവസ്ഥകൾ നിലവിലുണ്ടെങ്കിലും അവ ലംഘിക്കപ്പെടുന്നതായി സർക്കാരിന്റെ ശ്രദ്ധയിൽപ്പെട്ടിട്ടുണ്ട്. ചുമതലപ്പെട്ട ഏജൻസികൾ ഉത്തരവാദിത്വം നിറവേറ്റുന്നില്ലെന്നും കണ്ടെത്തിയിട്ടുണ്ട്.

നഗരകാര്യ ഡയറക്ടറും പഞ്ചായത്ത് ഡയറക്ടറും ഇക്കാര്യങ്ങളിൽ ശ്രദ്ധിക്കണമെന്നാണ് നിർദേശം. അനധികൃതമായ ഒരു നിർമാണത്തിനും തദ്ദേശസ്ഥാപനങ്ങൾ അനുമതി നൽകരുത്. ചട്ടങ്ങളിലെ വ്യവസ്ഥകൾക്കനുസരിച്ച് റോഡുകളിൽനിന്ന് അനധികൃത നിർമ്മാണങ്ങൾ കൃത്യമായി നീക്കം ചെയ്യുകയും വേണം.

1994-ലെ പഞ്ചായത്ത്‌രാജ് ആക്ട് സെക്‌ഷൻ 220 പ്രകാരം പൊതുറോഡുകൾ കൈയേറി മതിൽ പണിയുകയോ വേലിസ്ഥാപിക്കുകയോ മറ്റ് തടസ്സങ്ങളോ ഇറക്കുകളോ നിർമ്മിക്കുകയോ പാടില്ല. റോഡിൽനിന്ന് മൂന്നുമീറ്ററിനുള്ളിൽ ചുറ്റുമതിലല്ലാതെ ഒരു നിർമാണവും പാടില്ല.

അനുമതിയില്ലാതെ പൊതുസ്ഥലം കൈവശം വെക്കുന്നവരിൽനിന്ന് പിഴചുമത്താനും അനധികൃത കൈയേറ്റങ്ങൾ ഒഴിപ്പിക്കാനും 1996-ലെ പഞ്ചായത്ത് രാജ് 3(1) ചട്ടം വ്യവസ്ഥചെയ്യുന്നു. 1994-ലെ കേരള മുനിസിപ്പൽ ആക്ടിന്റെ 364, 366 മുതൽ 375 വരെ സെക്‌ഷനുകൾ തെരുവുകളിലെ കൈയേറ്റം ഒഴിപ്പിക്കുന്നതിനെപ്പറ്റി പരാമർശിക്കുന്നു. നഗരസഭയുടെ അനുമതികൂടാതെ പൊതുഭൂമിയിൽ മതിലോ വേലിയോ പോസ്റ്റോ കിണറോ ടാങ്കോ ഒന്നും തന്നെ സ്ഥാപിക്കാൻ പാടില്ല.

മുന്നറിയിപ്പില്ലാതെ അനധികൃത നിർമ്മാണങ്ങൾ നീക്കംചെയ്യാൻ സെക്രട്ടറിക്ക് അധികാരമുണ്ട്. പൊതുഭൂമി കൈവശം വെക്കുന്നവരിൽനിന്ന് പിഴ ഈടാക്കാനും വ്യവസ്ഥയുണ്ട്.