കണ്ണൂർ: ജില്ലാ കോൺഗ്രസ് കമ്മിറ്റി ഓഫീസിനായി നിർമ്മിച്ച പുതിയ കെട്ടിടത്തിന്റെ ഉദ്ഘാടനം സെപ്റ്റംബർ 2ന് നടക്കും. രാഹുൽ ഗാന്ധി എം.പി ഓണ്‍ലൈനായി ഉദ്ഘാടനം ചെയ്യുമെന്ന് ഡി.സി.സി അധ്യക്ഷന്‍ സതീശന്‍ പാച്ചേനി വാര്‍ത്ത സമ്മേളനത്തില്‍ അറിയിച്ചു. കെ.പി.സി.സി. പ്രസിഡന്റ് കെ. സുധാകരൻ എം.പി, എ.ഐ.സി.സി. സംഘടനാ ചുമതലയുള്ള ജനറൽ സെക്രട്ടറി കെ.സി. വേണുഗോപാൽ എം.പി, പ്രതിപക്ഷ നേതാവ് വി.ഡി. സതീശൻ, എ.കെ. ആന്റണി, ഉമ്മൻ ചാണ്ടി, രമേശ് ചെന്നിത്തല, കെ. മുരളീധരൻ എം.പി, വി.എം. സുധീരൻ, മുല്ലപ്പള്ളി രാമചന്ദ്രൻ, എം.എം. ഹസൻ എന്നിവർ പങ്കെടുക്കും.

6500 സ്ക്വയർ ഫീറ്റിൽ 3 നിലകളിലാണ് ഇപ്പോൾ പൂർണമായും നിർമ്മാണം പൂർത്തിയാക്കിയിട്ടുള്ളത്. കെട്ടിടത്തിൽ പാർക്കിങ് സൗകര്യവും താഴത്തെ നിലയിൽ ആധുനിക സജ്ജീകരണത്തോടു കൂടിയുള്ള കോൺഫറൻസ് ഹാളുമുണ്ട്. പോഷക സംഘടനകളുടെയും ഓഫീസുകൾ പ്രവർത്തിക്കാൻ സൗകര്യപ്രദമായ റൂമുകളും, നവമാധ്യമ ഇടപെടലുകൾക്കും മറ്റ് ഐ.ടി. സംബന്ധമായ ആവശ്യങ്ങൾക്ക് ഉപകരിക്കുന്ന സൗകര്യവും ഒരുക്കിയിട്ടുണ്ട്. 

കെ.പി.സി.സി പ്രസിഡന്റിന് ക്യാംപ് സൗകര്യം ഒരുക്കുന്നതിനു പ്രത്യേകം സജ്ജീകരിച്ച ഓഫീസ് മുറി താഴത്തെ നിലയിൽ പ്രവർത്തിക്കും. റിസപ്ഷൻ കൗണ്ടറും അടുക്കളയും ഗ്രൗണ്ട് ഫ്ലോറിലുണ്ട്. ഒന്നാം നിലയിൽ 1000 പേർക്ക് ഇരിക്കാവുന്ന ഓഡിറ്റോറിയവും 500 സ്ക്വയർ ഫീറ്റ് ലൈബ്രറി സൗകര്യവും ഒരുക്കിയിട്ടുണ്ട്. അതിഥികൾക്ക് താമസിക്കാനുള്ള മുറികളും ഡോർമിറ്ററി സൗകര്യത്തിനുള്ള മുറികളും ഒന്നാം നിലയിലുണ്ട്. അന്തരിച്ച മുൻ ഡി.സി.സി പ്രസിഡന്റ് കെ. സുരേന്ദ്രന്റെ നേതൃത്വത്തിൽ കെട്ടിടത്തിന്റെ അടിത്തറയും താഴത്തെ നിലയുടെയും നിർമ്മാണ പ്രവർത്തനങ്ങളുടെ സ്ട്രക്ച്ചറും പൂർത്തീകരിച്ചിരുന്നു. 

സതീശൻ പാച്ചേനി ഡി.സി.സി പ്രസിഡന്റായി ചുമതല ഏറ്റെടുത്തതിന് ശേഷം ഓഫീസ് നിർമ്മാണം പാർട്ടി നേരിട്ടാണ് നടത്തിയത്. ഓഫീസ് നിർമ്മാണവുമായി ബന്ധപ്പെട്ട് കഴിഞ്ഞ കാലത്തെ മുഴുവൻ ബാധ്യതകളും തീർത്തതായും നിലവിലുള്ള ബാധ്യതകൾ തീർക്കാൻ ബ്ലോക്ക് കോൺഗ്രസ് കമ്മിറ്റികളുടെ നേതൃത്വത്തിലുള്ള ധനസമാഹരണം പൂർത്തിയായതായും പ്രസിഡന്റ് സതീശൻ പാച്ചേനി പറഞ്ഞു. 

തിരഞ്ഞെടുപ്പിൽ ചെറിയ പോരായ്മയുണ്ടായിട്ടുണ്ട്. പാർട്ടിയുടെ അടിത്തട്ടിൽ ഇനിയും ശക്തിപ്പെടുത്താനുണ്ട്. പുതിയ കെ.പി.സി.സി പ്രസിഡന്റിന്റെ നേതൃത്വത്തിൽ കേരളത്തിൽ കോൺഗ്രസ് കരുത്താർജിക്കും. പ്രസിഡന്റ് പദവിയിൽ എല്ലാവരേയും ഒന്നിച്ച് കൊണ്ടുപോകാനായി. പ്രവർത്തകരുടെ ആവേശവും പിന്തുണയും വലുതാണ്. അഭിമാനത്തോടെയാണ് പടിയിറങ്ങുന്നത്. പാർട്ടി ഇനി ഏൽപ്പിക്കുന്ന എന്ത് ദൗത്യവും ഏറ്റെടുക്കുമെന്നും പാച്ചേനി പറഞ്ഞു. മ്മി