കണ്ണൂര്‍: ചെറുശ്ശേരി നമ്പൂതിരിയുമായി ബന്ധപ്പെട്ട ഐതിഹ്യങ്ങള്‍ നിറഞ്ഞുനില്‍ക്കുന്ന ചിറക്കല്‍ കിഴക്കേക്കര മതിലകം ശ്രീ കൃഷ്ണ ക്ഷേത്രത്തെ ചെറുശ്ശേരി സ്മാരകമാക്കി ഉയര്‍ത്തുന്നു. ക്ഷേത്രത്തിന്റെ തനിമ നിലനിര്‍ത്തി സാംസ്‌കാരിക പൈതൃക കേന്ദ്രമാക്കി മാറ്റാനാണ് തീരുമാനം. ഇതിന്റെ ഭാഗമായി കെ.വി. സുമേഷ് എം.എല്‍.എ, ജില്ലാ കളക്ടര്‍ ടി.വി. സുഭാഷ് എന്നിവര്‍ പ്രദേശം സന്ദര്‍ശിച്ച് ചിറക്കല്‍ കോവിലകം വലിയ രാജ സി.കെ. രവീന്ദ്ര വര്‍മയുമായി കൂടിക്കാഴ്ച നടത്തി.

ആയിരത്തി അഞ്ചൂറിലധികം വര്‍ഷം പഴക്കമുള്ളതാണ് ചിറക്കലില്‍ സ്ഥിതി ചെയ്യുന്ന കിഴക്കേക്കര മതിലകം ശ്രീ കൃഷ്ണ ക്ഷേത്രം. ചെറുശ്ശേരി കൃഷ്ണഗാഥ എഴുതി പൂര്‍ത്തിയാക്കിയത് ചിറക്കല്‍ ചിറയുടെ കിഴക്കുവശത്തുള്ള ഈ ക്ഷേത്രത്തില്‍ താമസിച്ചുകൊണ്ടാണെന്നാണ് പുരാണം. അദ്ദേഹത്തിന്റെ സാന്നിധ്യത്താല്‍ പ്രശസ്തമായ ഇടം സംരക്ഷിക്കപ്പെടണമെന്ന് ചിറക്കല്‍ കുടുംബാംഗങ്ങള്‍ ആവശ്യപ്പെടുകയായിരുന്നു. ഇതു സംബന്ധിച്ച് ക്ഷേത്രം ഭാരവാഹികള്‍ എം.എല്‍.എ.ക്ക് കത്തും നല്‍കിയിരുന്നു. പഴക്കം ചെന്ന ആരൂഢവും ഗോപുരവും ഊട്ടുപുരയും അതിന്റെ പഴമ നിലനിര്‍ത്തി പുനരുദ്ധരിക്കുവാനുള്ള പ്രവര്‍ത്തനങ്ങള്‍ സ്വീകരിക്കുമെന്ന് കെ.വി. സുമേഷ് എം.എല്‍.എ. പറഞ്ഞു. ക്ഷേത്രത്തിന്റെ തനിമയോടെ അവിടെ ചെറുശ്ശേരി സ്മാരകം, മ്യൂസിയം, ചെറുശ്ശേരിയുടെ പ്രതിമ, ഗ്രന്ഥശാല എന്നിവയാണ് അവിടെ നിര്‍മ്മിക്കുക. ക്ഷേത്ര കലാരൂപങ്ങള്‍ പ്രദര്‍ശിപ്പിക്കാനുള്ള ഒരു വേദിയാക്കി ഇവിടം മാറ്റിയെടുക്കും.

ഏഷ്യയിലെ ഏറ്റവും വലിയ മനുഷ്യനിര്‍മ്മിത ചിറയാണ് ചിറക്കലിലേത്. ചിറ നവീകരിച്ച് നീന്തല്‍ക്കുളമായി മാറ്റുന്നതിനും പദ്ധതിയുണ്ട്. വിനോദ സഞ്ചാരികള്‍ക്കായി ബോട്ടിംഗ് ഏര്‍പ്പെടുന്നതിനുള്ള സാധ്യത കൂടി പരിഗണിക്കുമെന്ന് എം.എല്‍.എ. അറിയിച്ചു. ക്ഷേത്രത്തിന്റെ ഗോപുരത്തില്‍ ചെറുശ്ശേരിയുടെ ജനനം മുതലുള്ള വിവിധ കാലഘട്ടങ്ങള്‍ ഇവിടെ കൊത്തിവച്ചിട്ടുണ്ട്. കേരളത്തില്‍ മറ്റൊരിടത്തും ഇത് കാണാനാവില്ല. ആരൂഢത്തില്‍ ഇരുന്നു കൊണ്ടാണ് ചെറുശ്ശേരി കൃഷ്ണ ഗാഥ എഴുതിയതെന്നാണ് പറയപ്പെടുന്നത്. 1500 ലധികം ആളുകള്‍ക്ക് ഒരുമിച്ച് ഭക്ഷണം കഴിക്കുവാനുള്ള സൗകര്യം ഊട്ടുപുരയിലുണ്ട്. അക്കാലത്ത് വിവാഹസദ്യ നല്‍കിയത് ഇവിടെ നിന്നായിരുന്നു. ഇവിടെയായിരിക്കും മ്യൂസിയം ഒരുക്കുക. ടൂറിസം, കായിക വകുപ്പുകളുടെയും ഫോക് ലോര്‍ അക്കാദമിയുടെയും സഹകരണത്തോടെയാണ് പദ്ധതികള്‍ പൂര്‍ത്തീകരിക്കുക. ഇതിനുവേണ്ട പ്രവര്‍ത്തനങ്ങള്‍ ഉടന്‍ ആരംഭിക്കുമെന്നും എം.എല്‍.എ.യും ജില്ലാ കളക്ടര്‍ ടി.വി. സുഭാഷും സന്ദര്‍ശന വേളയില്‍ അറിയിച്ചു.