ഇരിട്ടി: വള്ളിത്തോട് റേഷൻ കടയിൽ നിന്നും സ്വകാര്യ വ്യക്തിയുടെ ഗോഡൗണിലേക്ക് കടത്തിയ 345 കിലോ പച്ചരി താലൂക്ക് സപ്ലൈ അധികൃതർ പടികൂടി. താലൂക്ക് റേഷനിംങ്ങ് ഇൻസ്‌പെക്ടർക്ക് കിട്ടിയ രഹസ്യ പരാതിയുടെ അടിസ്ഥാനത്തിൽ നടത്തിയ പരിശോധനയിലാണ് റേഷൻ കാർഡ് ഉടമകൾക്ക് നൽകേണ്ട പച്ചരി സ്വകാര്യ വ്യക്തിയുടെ ഗോഡൗണിലേക്ക് മറിച്ച് വിൽപ്പന നടത്തിയതായി കണ്ടെത്തിയത്. 

വിളമന വില്ലേജ് ഒഫീസർ ബിബി മാത്യുവിന്റെ സാന്നിധ്യത്തിൽ സ്വകാര്യ വ്യക്തിയുടെ ഗോഡൗൺ തുറന്ന് അരി പിടിച്ചെടുത്തു. പിടിച്ചെടുത്ത അരി വള്ളിത്തോടെ 94ാം നമ്പർ റേഷൻ കടയിലേക്ക് മാറ്റി സ്റ്റോക്കിൽ ഉൾപ്പെടുത്തി. പ്രദേശത്തെ എം.ജി. ഐസക്കിന്റെ ലൈസൻസിയിലുള്ള 93ാം നമ്പർ റേഷൻ കടയിൽ നിന്നാണ് അരി കടത്തിയതെന്ന്പരിശോധനയിൽ തെളിഞ്ഞു.

ഐസക്കിന്റെ ലൈസൻസ് റദ്ദാക്കുന്നത് ഉൾപ്പെടെയുള്ള വകുപ്പ് തല നടപടികൾക്കായി ശുപാർശ നൽകി. റേഷൻ അരി കണ്ടെത്തിയ സ്വകാര്യ ഗോഡൗൺ ഉടമക്കെതിരെ കേസ്സെടുക്കുന്നത് ഉൾപ്പെടെയുള്ള നടപടികളും ആരംഭിച്ചു. റേഷനിംങ്ങ് ഇൻസ്‌പെക്ടർ പി.കെ വിജേഷിന്റെ നേതൃത്വത്തിലായിരുന്നു പരിശോധന നടത്തിയത്.