ശ്രീകണ്ഠപുരം : കുടിയാൻമലയ്ക്കു സമീപം മുന്നൂർ കൊച്ചിയിൽ ഒരാഴ്ചയായി ഭീതി വിതച്ച്, കൃഷി നശിപ്പിച്ച് കാട്ടാനകൾ. ഈ മാസം 8ന് ഇറങ്ങിയ ആനക്കൂട്ടം ഒരാഴ്ച കഴിഞ്ഞിട്ടും തിരികെ പോയിട്ടില്ല. ജനവാസ മേഖലയാണിത്. പൈതൽമലയുടെ അടിവാരത്തുള്ള വനത്തിൽ നിന്ന് ഇറങ്ങി, മൂന്നാം കൂപ്പ് വഴിയാണ് ആനക്കൂട്ടം ഇവിടെ എത്തിയത്. മൂന്നാം കൂപ്പിൽ നിന്നു തന്നെ വനംവകുപ്പുകാർ സാധാരണയായി ആനക്കൂട്ട ത്തെ പടക്കം പൊട്ടിച്ചും ബഹളം കൂട്ടിയും ഓടിച്ചുവിടാറുണ്ട്. ഇക്കുറി തടയാൻ കഴിഞ്ഞില്ല. ജനവാസ മേഖലയിൽ എത്തി വ്യാപകമായി കൃഷി നശിപ്പിച്ചു. റബർ, കശുമാവ്, തെങ്ങ് എന്നിവ നശിപ്പിച്ചിട്ടുണ്ട്.

പകൽ സമയത്തു കാട്ടിൽ അഭയം തേടുന്ന ആനക്കൂട്ടം രാത്രിയോടെ പുറത്തിറങ്ങു കയാണ്. ജോണി കണ്ടത്തിൽ, ബിജു മാമ്പ്ര എന്നിവരുടേത് ഉൾപ്പെടെ ഒട്ടേറെ പേരുടെ കാർഷിക വിളകൾ നശിപ്പിച്ചിട്ടുണ്ട്. വിവരമറിഞ്ഞ് ഇന്നലെ ഉച്ചയോടെ വനംവകുപ്പ് ഉദ്യോഗസ്ഥർ സ്ഥലത്തെ ത്തിയിരുന്നു. ഇന്നു തുടർനടപടികൾ എടുക്കുമെന്ന് ഉദ്യോഗസ്ഥർ പറഞ്ഞു. ആനയിറങ്ങുന്ന പൈതൽമല, മേലേ പുറത്തൊട്ടി, മൂന്നാം കൂപ്പ്, മുന്നൂർ കൊച്ചി ഭാഗങ്ങളുടെ ചുമതല വനിതകളായ ബീറ്റ് ഓഫിസർമാർക്കാണ്. കാട്ടാന ഭീഷണിയുള്ള സ്ഥലങ്ങളിൽ ഇവർക്ക് എത്തിപ്പെടാൻ കഴിയുന്നില്ല. ജനങ്ങൾ ഭയം കാരണം പുറത്തിറങ്ങാത്ത സ്ഥിതിയാണിപ്പോൾ.

രാത്രിയിൽ ആനക്കൂട്ടത്തിന്റെ ചിന്നം വിളിയും മരങ്ങൾ ഒടിക്കുന്ന ശബ്ദവും കേൾക്കാമെന്നു നാട്ടുകാർ പറയുന്നു. നടുവിൽ പഞ്ചായത്തിലെ ഏഴാം വാർഡിൽ പെടുന്നതാണീ സ്ഥലം. അതേസമയം പ്രദേശത്തു കാട്ടാന ഭീഷണി തൽക്കാലം ഒഴിവായതായി വനംവകുപ്പ് തളിപ്പറമ്പ് റേ‍ഞ്ചർ അറിയിച്ചു. 2 ദിവസമായി സ്ഥലത്ത് വനംവകുപ്പ് ഉദ്യോഗസ്ഥരുണ്ടായിരുന്നുവെന്നും അദ്ദേഹം പറഞ്ഞു. ആനയിറങ്ങുന്നതു തടയാൻ സ്ഥിരം സംവിധാനം പഞ്ചായത്ത് പ്രസിഡന്റുമായി ആലോചിച്ചു നടപ്പാക്കുമെന്നും അദ്ദേഹം അറിയിച്ചു.

ഓരോ തവണ ആനയിറങ്ങു മ്പോഴും ഉടൻ നടപടി എന്ന പ്രഖ്യാപനവുമായി ഉദ്യോഗസ്ഥരും ജനപ്രതിനിധികളും എത്തും. ആനവേലി പ്രഖ്യാപനങ്ങൾ വേറേയും.ഇപ്പോഴും കർഷകർക്കു രക്ഷയില്ലാത്ത അവസ്ഥയാണ്. മുന്നൂർ കൊച്ചിയിൽ ഒരാഴ്ചയായി വീട്ടിൽ നിന്ന് പുറത്തിറങ്ങാതെ ഭയന്നു കഴിയുകയാണ് ജനങ്ങൾ. കയ്യിൽ ആയുധമില്ലാതെ സ്ഥലം സന്ദർശിക്കുന്ന വനം വകുപ്പുകാർ വിചാരിച്ചാൽ പ്രത്യേകിച്ചൊന്നും ഇവിടെ ചെയ്യാനില്ല. ആനക്കൂട്ടത്തെ നേരിടാൻ മലയോര മേഖലയിൽ സ്ഥിരമായി വിദഗ്ധ സംഘത്തിന്റെ ക്യാംപ് ഓഫിസ് തുടങ്ങണമെന്നാണു കർഷകരുടെ ആവശ്യം.