തിരുവനന്തപുരം : റോഡുകളിൽ പതിവായി അപകടമുണ്ടാകുന്ന ബ്ലാക്ക് സ്പോട്ടുകളിൽ ഗതാഗതവകുപ്പ് എൽ.ഇ.ഡി മുന്നറിയിപ്പ് ബോർഡുകൾ സ്ഥാപിക്കും. ഈ ഭാഗത്ത് അനുവദനീയ വേഗത്തെക്കുറിച്ച് അറിയിപ്പ് നൽകും. അപകട മുന്നറിയിപ്പ് വാചകങ്ങളും ബോർഡുകളിൽ പ്രത്യക്ഷപ്പെടും. 

രണ്ടാം ഘട്ടത്തിൽ ആ പ്രദേശത്ത് അമിതവേഗത്തിൽ യാത്രചെയ്തതിന് പിഴ ഈടാക്കിയ വാഹനത്തിന്റെ ദൃശ്യങ്ങളും പ്രദർശിപ്പിക്കും. പ്രദേശത്തെ അപകടങ്ങളും മരണങ്ങളും സംബന്ധിച്ച കണക്കുകളും വ്യക്തമാക്കും. 

ദേശീയപാത, സംസ്ഥാന പാത, മറ്റു പ്രധാനപാതകൾ എന്നിവിടങ്ങളിലെ 300 ബ്ലാക്ക് സ്പോട്ടുകളിലാണ് ബോർഡ് ആദ്യം സ്ഥാപിക്കുക. 3 ലക്ഷം രൂപയാണ് ഒരു ബോർഡിന് ചെലവ്. ഇവ സംരക്ഷിക്കുന്നതിന് പ്രത്യേക നിരീക്ഷണ ക്യാമറകളും വയ്ക്കും. ഡിസംബറിന് മുൻപ് കേരളത്തിലെ അപകടനിരക്കിൽ 25% കുറവ് വരുത്തണമെന്നാണ് സുപ്രീംകോടതി റോഡ് സേഫ്റ്റി ചെയർമാൻ കേരളത്തിന് നൽകിയിട്ടുള്ള നിർദേശം. ഇതിന്റെ ഭാഗമായാണ് നടപടികൾ.