കരിവെള്ളൂർ: പ്രകൃതിയും മനുഷ്യനും തമ്മിലുള്ള ആത്മബന്ധം അടയാളപ്പെടുത്തി കർഷകഗൃഹങ്ങളിൽ ഏർപ്പ് ഉത്സവം നടന്നു. ഇനിയും പത്തായപ്പുരകൾ നിറയണമേ എന്ന പ്രാർത്ഥനയോടെ മകരം 28-ാം തീയതി ഭൂമിദേവിയെ പൂജിക്കുന്ന ചടങ്ങാണ് ഏർപ്പ് ഉത്സവം. ഭൂമിദേവി പുഷ്പിണിയായ ദിവസമാണ് മകരം 28 എന്നാണ് വിശ്വാസം.

പഴയകാലത്ത് ഏർപ്പ് ദിവസം കർഷക ഗൃഹങ്ങളിൽ കാർഷിക വൃത്തിയുമായി ബന്ധപ്പെട്ട നിരവധി ചടങ്ങുകൾ നടക്കാറുണ്ട്. ഋതുമതിയായ ഭൂമിദേവിയെ നോവിക്കാതിരിക്കാൻ വേണ്ടി ഏർപ്പ് ദിവസം കർഷകർ ആയുധങ്ങൾ ഭൂമിയിലിറക്കില്ല. ചൂല് കൊണ്ട് മുറ്റമടിക്കാൻ പോലും പാടില്ലെന്നാണ് വിശ്വാസം. മധുരം നൽകിയാണ് ഏർപ്പ് ദിവസം കർഷകർ ഭൂമീപൂജ നടത്തുന്നത്. ഇതിനായി വീടുകളിൽ വെല്ലം അരിപ്പൊടി, തേങ്ങ ഇവ ചേർത്ത് തുവരപ്പായസം ഉണ്ടാക്കും. രണ്ടാം വിളകൊയ്ത്ത് കഴിഞ്ഞ പാടങ്ങളിൽ വെള്ളരി കൃഷി ആരംഭിക്കുന്നതും ഏർപ്പ് ദിനത്തിലാണ്. ‘ഏർപ്പിന് നട്ടാൽ വിഷുക്കണിക്ക് വെള്ളരിക്ക’ എന്ന പ്രയോഗം തന്നെ കാർഷിക മേഖലയിലുണ്ട്.

പഴയകാലത്തെ ഗ്രാമീണ ജീവിതത്തിലെ ഭാഷാ പ്രയോഗത്തിന് പോലും ഏർപ്പ് ദിനവുമായി ബന്ധമുണ്ട്. ഇല്ലാത്ത കാര്യം പറഞ്ഞ് ആളെ പറ്റിക്കുന്നതിന് ‘ഏർപ്പ് വരക്കുന്ന കോലും പരിപ്പുമുറിക്കുന്ന കത്തിയും പോലെ’ എന്ന പ്രായോഗം തന്നെ ഗ്രാമങ്ങളിലുണ്ട്. കാലാവസ്ഥാ വ്യതിയാനം നമ്മുടെ കൃഷിരീതിയിൽ കാര്യമായ മാറ്റങ്ങൾ വരുത്തിയിട്ടുണ്ടെങ്കിലും ഏർപ്പ് ദിനത്തിലെ ചടങ്ങുകൾ അതേപടി തുടരുന്ന കർഷക ഗൃഹങ്ങൾ ഇന്നും ഗ്രാമങ്ങളിലുണ്ട്.