കണ്ണൂർ: കാൻസർ നിയന്ത്രിത കണ്ണൂർ കോർപ്പറേഷൻ പദ്ധതിയുടെ ഭാഗമായി സന്നദ്ധ പ്രവർത്തകർക്കുള്ള പരിശീലനം തളാപ്പ് മിക്സഡ് യു.പി. സ്കൂളിൽ നടന്നു. മേയർ അഡ്വ. ടി.ഒ. മോഹനൻ ഉദ്ഘാടനം ചെയ്തു. അങ്കണവാടി-ആശാ വർക്കർമാർ, കുടുംബശ്രീ പ്രവർത്തകർ ഉൾപ്പെടെയുള്ള നൂറോളം ആരോഗ്യ-സന്നദ്ധ പ്രവർത്തകർക്കാണ് പരിശീലനം സംഘടിപ്പിച്ചത്. വളന്റിയർമാരുടെ സഹായത്തോടെ മലബാർ കാൻസർ സൊസൈറ്റിയുടെ നേതൃത്വത്തിൽ വിവിധ സ്ഥലങ്ങളിൽ മൂന്നു ഫിൽട്ടർ ക്യാമ്പുകളും ഒരു മെഗാ ക്യാമ്പും നടത്തും.

മെഗാ ക്യാമ്പിൽ സഞ്ചരിക്കുന്ന കാൻസർ ആസ്പത്രിയായ ‘സഞ്ജീവനി ടെലി ഓങ്കോ നെറ്റ്’ യൂണിറ്റ് ഉപയോഗിച്ച് അൾട്രാസൗണ്ട് സ്കാനിങ്, ഡിജിറ്റൽ മാമോഗ്രം, വീഡിയോ കോൺഫറൻസിങ് എന്നിവ വഴി രോഗനിർണയം നടത്തും. വായിലെ കാൻസർ, സ്തനാർബുദം, ഗർഭാശയ കാൻസർ, തൈറോയ്ഡ് കാൻസർ തുടങ്ങിയവ നേരത്തെ കണ്ടെത്തി ചികിത്സ നിർദേശിക്കുന്നതിനാണ് ക്യാമ്പ് സംഘടിപ്പിക്കുന്നത്.

കോർപ്പറേഷനിലെ പഴയ മുനിസിപ്പൽ പ്രദേശത്തെ വാർഡുകളിലാണ് പദ്ധതി ഇപ്പോൾ നടപ്പിലാക്കുക. 2018-19 ൽ പള്ളിക്കുന്ന് പുഴാതി സോണലുകളിലും 2019-20 ൽ ചേലോറ, എളയാവൂർ, എടക്കാട് സോണലുകളിലും കോർപ്പറേഷന്റെ നേതൃത്വത്തിൽ കാൻസർ നിർണയ ക്യാമ്പുകൾ സംഘടിപ്പിച്ചിരുന്നു. ഡെപ്യൂട്ടി മേയർ കെ. ഷബീന അധ്യക്ഷത വഹിച്ചു. മലബാർ കാൻസർ കെയർ സൊസൈറ്റി പ്രസിഡന്റ് ഡി. കൃഷ്ണനാഥ പൈ മുഖ്യപ്രഭാഷണം നടത്തി.

സ്ഥിരം സമിതി ചെയർമാന്മാരായ എം.പി. രാജേഷ്, പി. ഷമീമ, അഡ്വ. പി. ഇന്ദിര, സിയാദ് തങ്ങൾ, സുരേഷ് ബാബു എളയാവൂർ, കൗൺസിലർ മുസ്ലിഹ് മഠത്തിൽ, ഡോ. രാജേശ്വരി രാജ് തുടങ്ങിയവർ സംസാരിച്ചു. ഡോ. വർഷ ഗംഗാധരൻ, ഡോ. ദീപ്തി എന്നിവർ പരിശീലനത്തിന് നേതൃത്വം നൽകി.