തിരുവനന്തപുരം : ജലാശയങ്ങളിലെ മാലിന്യങ്ങൾ നീക്കുന്നതിൽ സിൽറ്റ് പുഷറിന്റെ ഉപയോഗം വലിയ മാറ്റമുണ്ടാക്കുമെന്ന് മന്ത്രി റോഷി അഗസ്റ്റിൻ. ജലസേചന വകുപ്പ് വിവിധ ശുചീകരണ പദ്ധതികളുടെ ഭാഗമായി വാങ്ങിയ സിൽറ്റ്പുഷറിന്റെ ട്രയൽ റൺ ആക്കുളം കായലിൽ ഉദ്ഘാടനം ചെയ്യുകയായിരുന്നു മന്ത്രി. ജലാശയങ്ങളിലെ ചെളി നീക്കം ചെയ്യുന്നതിന് വാട്ടർ ബുൾഡോസറായി ഉപയോഗിക്കാവുന്ന യന്ത്രമാണ് നെതർലാൻഡ്‌സ് നിർമിതമായ സിൽറ്റ് പുഷർ.

നിലവിൽ ആഴത്തിൽ മാലിന്യം നീക്കം ചെയ്യുന്നതിനുള്ള സംവിധാനം ഇല്ല. സിൽറ്റ് പുഷർ ഒന്നരമീറ്റർ ആഴത്തിൽ ഇറങ്ങിച്ചെന്ന് ചെളി നീക്കംചെയ്യും. കൂടാതെ ഇരുവശങ്ങളിലും ഘടിപ്പിച്ചിട്ടുള്ള ഡോസർ ബ്ലേഡ് ആറ് മീറ്റർ വീതിയിൽ പായലുകളും കരയിലേക്ക് മാറ്റും. ഒരു മണിക്കൂറിൽ 100 ക്യുബിക് മീറ്റർ പ്രദേശത്തെ ചെളി നീക്കാൻ യന്ത്രത്തിനു സാധിക്കും. നിലവിൽ ഒരു സിൽറ്റ് പുഷറാണ് വാങ്ങിയിട്ടുള്ളത്. കൗൺസിലർ എസ്.സുരേഷ് കുമാർ, ജലസേചന വകുപ്പ് ചീഫ് എൻജിനിയർ ഡി.സതീശൻ, എക്‌സിക്യുട്ടീവ് എൻജിനിയർ പ്രദീപ് കുമാർ തുടങ്ങിയവരും പങ്കെടുത്തു.