ഇരിട്ടി : ജീവിതത്തിൽ സ്വരുക്കൂട്ടിയതും സ്വന്തം വീടും ജീവകാരുണ്യപ്രവർത്തനത്തിനായി സമ്മാനിച്ച്‌ ദമ്പതികൾ. ഉളിയിലെ കോമത്ത്‌ പുതിയവീട്ടിൽ കൃഷ്‌ണൻ നമ്പ്യാരും(88) ഭാര്യ ജാനുവമ്മ(78)യുമാണ്‌ ഐ.ആർ.പി.സി.ക്ക്‌ വീടും 32 സെന്റ്‌ ഭൂമിയും കൈമാറിയത്‌. സാന്ത്വനപരിചരണത്തിനായി ഇരിട്ടിയിൽ ആസ്ഥാനമൊരുക്കുന്നതിനാണ്‌ വയോധിക ദമ്പതികൾ വീടും പുരയിടവും കൈമാറിയത്‌.  

ഉളിയിൽ പാലത്തിനടുത്ത്‌ പടിക്കച്ചാൽ റോഡിരികിലെ ഓടിട്ട വീടും 32 സെന്റ്‌ സ്ഥലവുമാണ്‌ ഐ.ആർ.പി.സി.ക്ക്‌ ദാനാധാരം ചെയ്‌ത്‌ നൽകിയത്‌. 2018ലാണ്‌ കൃഷ്‌ണൻ നമ്പ്യാരും ജാനുവമ്മയും വീടും സ്ഥലവും നൽകാൻ ആഗ്രഹം പ്രകടിപ്പിച്ചത്‌. അശരണർക്ക്‌ സാന്ത്വനമേകാൻ ഇരിട്ടി മേഖലയിൽ സ്ഥാപനം ആരംഭിക്കണമെന്നായിരുന്നു ആഗ്രഹം. കോവിഡ്‌ വ്യാപിച്ചതോടെ തീരുമാനം നടപ്പാക്കുന്നത്‌ വൈകി. ആരുമില്ലാതെ വലയുന്നവർക്ക്‌ അത്താണിയാവുന്ന പ്രവർത്തനങ്ങൾ ഐ.ആർ.പി.സി ഭംഗിയായി നടപ്പാക്കുന്നുണ്ടെന്ന്‌ ഇവർ പറഞ്ഞു. 

സി.പി.എം പുന്നാട്‌ ലോക്കൽ കമ്മിറ്റി ഉളിയിൽ പാലത്തിന്‌ സമീപം സംഘടിപ്പിച്ച ചടങ്ങിൽ ദാനാധാരം ഐ.ആർ.പി.സി ഉപദേശക സമതി ചെയർമാൻ പി. ജയരാജൻ ഏറ്റുവാങ്ങി. മത-ജാതി ചിന്തയില്ലാതെ സംരക്ഷണം അർഹിക്കുന്നവർക്കൊപ്പമാണ്‌ ഐ.ആർ.പി.സി.യെന്ന്‌ പി. ജയരാജൻ പറഞ്ഞു. ജില്ലാ ഐ.ആർ.പി.സി ചെയർമാൻ എം. പ്രകാശൻ അധ്യക്ഷനായി. കെ. രാജൻ റിപ്പോർട്ട്‌ അവതരിപ്പിച്ചു.

സി.പി.എം ജില്ലാ കമ്മിറ്റി അംഗങ്ങളായ കെ. ശ്രീധരൻ, ബിനോയ്‌ കുര്യൻ, കെ. മോഹനൻ, ഏരിയാ സെക്രട്ടറി കെ.വി. സക്കീർ ഹുസൈൻ, ഐ.ആർ.പി.സി സെക്രട്ടറി കെ.വി. മുഹമ്മദ്‌ അഷറഫ്‌, ഇ.എസ്‌. സത്യൻ, നഗരസഭാ ചെയർമാൻ കെ. ശ്രീലത, ടി.എ. ജോസഫ്‌, എൻ. രാജൻ, ഐ.ആർ.പി.സി സോണൽ കൺവീനർ പവിത്രൻ പായം എന്നിവർ സംസാരിച്ചു. ചടങ്ങിൽ ജാനുവമ്മയെയും കൃഷ്‌ണൻ നമ്പ്യാരെയും ആദരിച്ചു.