കൂത്തുപറമ്പ്‌ : കൂത്തുപറമ്പ്‌ ഹൈസ്‌കൂൾ ഭരണസമിതിയായ കൂത്തുപറമ്പ്‌ എഡ്യൂക്കേഷണൽ സൊസൈറ്റി മാനേജർ നിയമനം പൊതുവിദ്യാഭ്യാസ വകുപ്പ്‌ റദ്ദാക്കി. കെ. ബാലനെ മാനേജരായി തെരഞ്ഞെടുത്ത തീരുമാനം സാധൂകരിച്ച വിദ്യാഭ്യാസ അഡീഷണൽ ഡയറക്ടറുടെ നിർദേശം അസാധുവാക്കി പൊതുവിദ്യാഭ്യാസ വകുപ്പ്‌ വെള്ളിയാഴ്‌ച പുറപ്പെടുവിച്ച ഉത്തരവിൽ തലശേരി വിദ്യാഭ്യാസ ഓഫീസർക്ക്‌ മാനേജരുടെ താൽക്കാലിക ചുമതല നൽകി. കോൺഗ്രസ്‌ നിയന്ത്രണത്തിലുള്ള മാനേജ്‌മെന്റിൽ ചേരിതിരിഞ്ഞു നടന്ന അധികാരതർക്കത്തിന്റെ ഭാഗമായി ഹൈക്കോടതി പുറപ്പെടുവിച്ച ഉത്തരവുകൂടി പരിഗണിച്ചാണ്‌ സർക്കാർ തീരുമാനം.

ഒരു വിഭാഗത്തെ ഒഴിവാക്കാൻ 2018 ഒക്ടോബർ 14ന്‌ ചേർന്ന ജനറൽബോഡി യോഗത്തിൽ സൊസൈറ്റി ബൈലോ ഭേദഗതി ചെയ്‌ത്‌ ഭരണസമിതിയുടെയും മാനേജരുടെയും കാലാവധി ഏഴ്‌ വർഷത്തിൽനിന്ന്‌ അഞ്ചാക്കി. തുടർന്നാണ്‌ പുതിയ ഭരണസമിതിയെയും മാനേജരെയും തെരഞ്ഞെടുത്തത്‌. ബൈലോ ഭേദഗതി ചെയ്യുമ്പോൾ കേരള വിദ്യാഭ്യാസ ചട്ടപ്രകാരം(കെഇആർ) വിദ്യാഭ്യാസ ഉപഡയറക്ടറുടെ അംഗീകാരം വാങ്ങണം. എന്നാൽ, കൂത്തുപറമ്പ്‌ സൊസൈറ്റി അംഗീകാരം വാങ്ങിയില്ല. എങ്കിലും മാനേജരെ നിയമിച്ചതിനെ സാധൂകരിക്കാൻ അഡീഷണൽ ഡയറക്ടർ ഡിഇഒക്ക്‌ നിർദേശം നൽകി. ഇതിനെതിരെ കൂത്തുപറമ്പ്‌ സ്വദേശിയും മുൻഭരണസമിതി അംഗവുമായ സത്യൻ നരവൂർ സർക്കാരിന്‌ പരാതി നൽകുകയും ഹൈക്കോടതിയെ സമീപിക്കുകയും ചെയ്‌തു. തുടർന്നുണ്ടായ ഹൈക്കോടതി ഉത്തരവുകളും പരിഗണിച്ചശേഷമാണ്‌ കെഇആർ വ്യവസ്ഥകൾ പാലിക്കാതെ ബൈലോ ഭേദഗതി ചെയ്‌ത്‌ നടത്തിയ നിയമനം റദ്ദാക്കിയത്‌.

പുതിയ മാനേജരെ നിയമിക്കുന്നതുവരെ സ്‌കൂളിന്റെ സുഗമമായ നടത്തിപ്പിനും വിദ്യാർഥികളുടെ വിദ്യാഭ്യാസ അവകാശ സംരക്ഷണം ലക്ഷ്യമിട്ടുമാണ്‌ തലശേരി വിദ്യാഭ്യാസ ഓഫീസർക്ക്‌ മാനേജരുടെ താൽക്കാലിക ചുമതല നൽകിയത്‌. കെഇആർ പ്രകാരം വിദ്യാഭ്യാസ അധികൃതർ അംഗീകരിച്ച ബൈലോയെ അടിസ്ഥാനപ്പെടുത്തി മാനേജരെ നിയമിക്കുമ്പോൾ ജില്ലാ വിദ്യാഭ്യാസ ഓഫീസർ അംഗീകാരം നൽകും. ഹർജിക്കാരും പുനഃപരിശോധനാ ഹർജിക്കാരും തമ്മിലുള്ള തർക്കം ബന്ധപ്പെട്ട സിവിൽ കോടതി തീരുമാനിക്കട്ടെയെന്നും അതിൽ സർക്കാരിന്‌ പങ്കില്ലെന്നും ഉത്തരവിൽ വ്യക്തമാക്കി.