തലശ്ശേരി: തലശ്ശേരി അതിരൂപതയുടെ നേതൃത്വത്തിൽ കണ്ണൂർ, കാസർകോട് ജില്ലയിലുള്ള വൃക്കരോഗികൾക്ക് ഡയാലിസിസ് പദ്ധതി നടപ്പിലാക്കുന്നു. ജാതിമതഭേദമെന്യേ എല്ലാവർക്കും സഹായകമാകുന്ന പദ്ധതിയാണ്. ആർച്ച് ബിഷപ്പ് മാർ ജോർജ് ഞരളക്കാട്ടിന്റെ പൗരോഹിത്യ സുവർണജൂബിലി സ്മാരകമായാണ് ‘എയ്ഞ്ചൽ ഡയാലിസിസ്’ എന്ന് പേരിട്ട പദ്ധതി നടപ്പിലാക്കുന്നത്. എയ്ഞ്ചൽ എന്ന പേരിൽ രജിസ്റ്റർ ചെയ്ത ട്രസ്റ്റാണ് പദ്ധതിക്ക് നേതൃത്വം നൽകുക.

അതിരൂപതയിലെ 16 ഫൊറോനകളുടെയും സുമനസ്സുകളുടെയും സഹായത്തോടെയാണ് നടപ്പിലാക്കുക. സാമ്പത്തികശേഷി ഇല്ലാത്തവർക്ക് സൗജന്യമായി ചെയ്തുകൊടുക്കുമെന്ന് സഹായമെത്രാൻ മാർ ജോസഫ് പാംപ്ലാനി പറഞ്ഞു. കരുവഞ്ചാലിലുള്ള സെയ്‌ന്റ് ജോസഫ് ആസ്പത്രിയിൽ 20 ഡയാലിസിസ് യന്ത്രങ്ങൾ സ്ഥാപിക്കും. മറ്റു സ്ഥലങ്ങളിലുള്ളവർക്ക് സഹായം നൽകും. ഭാവിയിൽ വിവിധ കേന്ദ്രങ്ങളിൽ ഡയാലിസിസ് കേന്ദ്രങ്ങൾ സ്ഥാപിക്കും. 30-ന് തലശ്ശേരിയിൽ നടക്കുന്ന മാർ ജോർജ് ഞരളക്കാട്ടിന്റെ പൗരോഹിത്യ സുവർണജൂബിലി ആഘോഷച്ചടങ്ങിൽ കേന്ദ്രമന്ത്രി വി. മുരളീധരൻ ഉദ്ഘാടനം നിർവഹിക്കും.