കണ്ണൂർ: തുണികൾ ബഹുവർണ്ണമാക്കുന്നതിനുള്ള അത്യാധുനിക സംവിധാനം നാടുകാണിയിൽ യാഥാർഥ്യമാകുന്നു. ദിവസത്തിൽ 1500 മീറ്റർവരെ തുണിയിൽ വർണങ്ങൾ പതിപ്പിക്കാൻ കഴിയുന്ന സംവിധാനമാണ് വെള്ളിയാഴ്ച വ്യവസായമന്ത്രി പി. രാജീവ് ഉദ്ഘാടനം ചെയ്യുന്നത്. സംസ്ഥാന ടെക്‌സ്റ്റൈൽ കോർപ്പറേഷന്റെ കീഴിൽ 26 കോടിയോളം രൂപ ചെലവിൽ സ്ഥാപിക്കുന്ന ഡൈയിങ് ആൻഡ് ഡിജിറ്റൽ പ്രിന്റിങ് സമുച്ചയത്തിന്റെ ആദ്യഭാഗമാണിത്.

കേരളത്തിലെ ഉത്‌പാദകർ തുണിയിൽ ബഹുവർണ്ണ ഡിജിറ്റൽ പ്രിന്റിങ്ങിന് ഇപ്പോൾ ഈറോഡ്, ബെംഗളൂരു, അഹമ്മദാബാദ് എന്നിവിടങ്ങളിലെ ടെക്‌സ്റ്റൈൽ ഡിജിറ്റൽ പ്രസുകളെയാണ് ആശ്രയിക്കുന്നത്. തുണി പ്രിന്റിങ് നടത്തി തിരിച്ചെത്തിക്കുന്നതിന് വലിയ കടത്തുകൂലിയും സമയനഷ്ടവുമുണ്ടാകുന്നു. വിദേശത്തെ ഓർഡറുകളനുസരിച്ച് കൃത്യസമയത്ത് തുണി കയറ്റിയയക്കുന്നതിന് ഇത് പ്രയാസം സൃഷ്ടിക്കുന്നു. നാടുകാണിയിലെ ഡിജിറ്റൽ പ്രിന്റിങ് യൂണിറ്റ് വരുന്നതോടെ ഈ പ്രശ്നത്തിന് പരിഹാരമാകും. 

ഫാബ്രിക് ഡൈയിങ് യൂണിറ്റും അനുബന്ധ സൗകര്യങ്ങളും നാടുകാണി കിൻഫ്ര പാർക്കിൽ ഒരുവർഷത്തിനകം ഒരുങ്ങും. പ്രതിദിനം 40,000 മീറ്റർ തുണി ഡൈ ചെയ്യാനുള്ള സംവിധാനമാണുണ്ടാക്കുന്നത്. കൈത്തറി സൊസൈറ്റികൾ, ഹാൻവീവ്, സ്വകാര്യ കൈത്തറി ഉത്‌പാദകർ, കയറ്റുമതിക്കാർ എന്നിവർക്കെല്ലാം ഏറെ പ്രയോജനപ്പെടുന്നതാണ് നാടുകാണിയിലെ ഫാബ്രിക് ഡൈയിങ് ആൻഡ് ഡിജിറ്റൽ പ്രന്റിങ് യൂണിറ്റെന്ന് കേരളാ സ്റ്റേറ്റ് ടെക്‌സ്റ്റൈൽ കോർപ്പറേഷൻ മാനേജിങ് ഡയറക്ടർ കെ.ടി. ജയരാജൻ പറഞ്ഞു. സ്ഥാപനം പ്രവർത്തന സജ്ജമായാൽ 180 പേർക്ക് നേരിട്ടും മുന്നൂറോളം പേർക്ക് പരോക്ഷമായും തൊഴിൽ ലഭിക്കും. നാടുകാണിയിൽ വെള്ളിയാഴ്ച ഉദ്ഘാടനം ചെയ്യുന്ന ടെക്‌സ്റ്റൈൽ ഡിജിറ്റൽ പ്രിന്റിങ് സംവിധാനം സംസ്ഥാനത്തെ ടെക്‌സ്റ്റൈൽ മേഖലയ്ക്ക് വലിയ പ്രോത്സാഹനമാകുമെന്ന് കേരളാ ടെക്‌സ്റ്റൈൽ എക്‌സ്‌പോർട്ട്‌ ഓർഗനൈസേഷൻ മുഖ്യരക്ഷാധികാരി സി. ജയചന്ദ്രൻ പറഞ്ഞു. പ്രിന്റിങ്ങിന് മുൻപുള്ള പ്രീ-പ്രോസസിങ് സംവിധാനം ഇപ്പോൾ ഒരുങ്ങിയിട്ടില്ലെന്നത് പോരായ്മയാണ്-അദ്ദേഹം പറഞ്ഞു.