തിരുവനന്തപുരം: വില്ലേജ് ഓഫിസർമാർ ഇനി സ്വന്തം വില്ലേജുകളിൽ സ്കൂട്ടറുകളിൽ ചുറ്റിക്കറങ്ങി സേവനം ചെയ്യും. സംസ്ഥാനത്തെ ആയിരത്തി അഞ്ഞൂറിൽപരം വില്ലേജ് ഓഫിസർമാർക്ക് ഔദ്യോഗിക വാഹനമായി ഇലക്ട്രിക് സ്കൂട്ടർ നൽകാൻ റവന്യൂ വകുപ്പ് നീക്കം തുടങ്ങി. ഏറെ ജോലിഭാരമുള്ള വില്ലേജ് ഓഫിസർമാർ യാത്ര ചെയ്യാൻ പ്രയാസപ്പെടുന്നത് കണക്കിലെടുത്താണിത്. അന്തിമതീരുമാനമായില്ലെങ്കിലും റവന്യൂ വകുപ്പിന്റെ തലപ്പത്ത് ഇതിനുള്ള ചർച്ചകൾ നടക്കുകയാണ്. 

നിലവിൽ സ്ഥലപരിശോധനയ്ക്കും വിവിധ റവന്യൂ സർട്ടിഫിക്കറ്റുകൾ നൽകുന്നതിനു മുന്നോടിയായുള്ള അന്വേഷണങ്ങൾക്കുമായി വില്ലേജിലെ വിവിധ ഭാഗങ്ങളിലേക്ക് ഉദ്യോഗസ്ഥർ പോകുന്നത് സ്വന്തമോ മറ്റുള്ളവരുടെയോ വാഹനങ്ങളിലാണ്.

മന്ത്രി കെ.രാജൻ റവന്യൂ വകുപ്പിന്റെ ചുമതലയേറ്റ ശേഷം വില്ലേജ് ഓഫിസർമാരുമായി നടത്തിയ ഓൺലൈൻ യോഗത്തിൽ യാത്രാക്ലേശവും ചർച്ചയായിരുന്നു. മറ്റു സർ‌ക്കാ‍ർ വകുപ്പുകളിലെ ഫീൽഡ് തസ്തികയിലെ മിക്ക ഉദ്യോഗസ്ഥർക്കും ഔദ്യോഗിക വാഹനങ്ങളുണ്ട്. എന്നാൽ, റവന്യു വകുപ്പിൽ തഹസിൽദാർ മുതലാണ് ഔദ്യോഗിക വാഹനത്തിന് അനുവാദം. ഭൂനികുതി, കെട്ടിടങ്ങൾക്കുള്ള ഒറ്റത്തവണ നികുതി, ആഡംബര നികുതി, റവന്യൂ റിക്കവറി നടപടികൾ തുടങ്ങിയവയിലൂടെ സർക്കാരിനു വരുമാനം ഏറെ കണ്ടെത്തി നൽകുന്ന വകുപ്പാണ് എങ്കിലും വാഹനങ്ങൾ പലതും പഴഞ്ചനാണ്.

വിവിധ ആവശ്യങ്ങൾക്കായി വില്ലേജ് ഓഫിസുകളിൽ എത്തുന്ന പൊതുജനങ്ങൾ തന്നെ വാഹനങ്ങൾ സംഘടിപ്പിച്ച് ഉദ്യോഗസ്ഥരെ കൊണ്ടുപോകുന്ന സ്ഥിതിയുണ്ട്. ഉദ്യോഗസ്ഥർ മറ്റു വാഹനങ്ങളെ ആശ്രയിക്കുന്നത് കൊണ്ടുള്ള ആരോപണങ്ങൾ തടയാനും ഔദ്യോഗിക വാഹനം നൽകുന്നതിലൂടെ സാധിക്കുമെന്നാണ് വകുപ്പിന്റെ വിലയിരുത്തൽ. 

പദ്ധതിവിഹിതത്തിൽ ഇതിനായി എത്ര തുക മാറ്റിവയ്ക്കേണ്ടി വരുമെന്നത് പരിശോധിച്ചു വരികയാണ്. സംസ്ഥാനത്താകെ 1664 വില്ലേജുകൾ ഉള്ളതിൽ 132 എണ്ണം ഗ്രൂപ്പ് വില്ലേജുകളാണ്. ഒന്നിലധികം വില്ലേജുകൾക്കായി ഒറ്റ ഓഫിസും ഒരേ ജീവനക്കാരും പ്രവർത്തിക്കുന്നവയാണ് ഗ്രൂപ്പ് വില്ലേജുകൾ. അങ്ങനെ ആകെ 1532 വില്ലേജ് ഓഫിസുകളും അത്രയും വില്ലേജ് ഓഫിസർമാരും ഉണ്ടെന്നാണ് ഔദ്യോഗിക കണക്ക്.