പേരാവൂർ: സിനിമയിൽ ചാൻസ് വാഗ്ദാനം ചെയ്ത് അൻപതോളം പേരിൽ നിന്ന് പണം തട്ടിയെടുത്ത മൂവർ സംഘത്തിനെ അറസ്റ്റ് ചെയ്യണമെന്നാവശ്യപ്പെട്ട് ഡി.വൈ.എഫ്.ഐയുടെ പോസ്റ്റർ പ്രചരണം.

സിനിമയുടെ പേരില്‍ പണം വാങ്ങി വഞ്ചിച്ച് രാഷ്ട്രീയ നേട്ടം കൊയ്തവരെ തിരിച്ചറിയുക, പാവങ്ങളുടെ പണം തട്ടിയെടുത്ത പൊതു പ്രവര്‍ത്തകര്‍ എന്ന് മേനി നടിക്കുന്നവരെ ഒറ്റപ്പെടുത്തുക, സിനിമ തട്ടിപ്പിലെ ഉന്നത ബന്ധം അന്വേഷിക്കുക തുടങ്ങിയ പോസ്റ്ററുകളാണ് പൊതു സ്ഥലങ്ങളിൽ പതിച്ചത്. പഞ്ചായത്ത് തിരഞ്ഞെടുപ്പിൽ ചിലവഴിച്ച ഫണ്ട് സിനിമാ തട്ടിപ്പിലെ പണമാണെന്നും പോസ്റ്ററിലുണ്ട്.

പേരാവൂര്‍ കേന്ദ്രമായി പ്രവര്‍ത്തിക്കുന്ന ഭീഷ്മ കലാസാംസ്‌കാരിക വേദിയുടെ ഭാരവാഹികളാണെന്ന് സ്വയം പരിചയപ്പെടുത്തുന്ന ഉരുവച്ചാൽ സ്വദേശി ചോതി രാജേഷ്, കോളയാട് സ്വദേശി മോദി രാജേഷ്, പേരാവൂർ സ്വദേശി മനോജ് താഴെപ്പുരയിൽ എന്നിവർക്കെതിരെ സിനിമാ തട്ടിപ്പിൽ വഞ്ചിതരായവർ കണ്ണൂരില്‍ വാര്‍ത്തസമ്മേളനത്തില്‍ നടത്തിയ വെളിപ്പെടുത്തലിൻ്റെ സാഹചര്യത്തിലാണ് പേരാവൂരിൽ പോസ്റ്റര്‍ പ്രത്യക്ഷപ്പെട്ടത്. തട്ടിപ്പ് സംഘത്തിനെതിരെ കൂത്തുപറമ്പ് പോലീസ് കേസെടുക്കുകയും ചെയ്തിരുന്നു.

സിനിമാ തട്ടിപ്പിൽ ആരോപണ വിധേയരായവരിൽ ഒരാൾ വ്യാപാരി വ്യവസായി ഏകോപന സമിതി പേരാവൂർ മേഖല കമ്മിറ്റി ഭാരവാഹിയാണ്. ഇത് വ്യാപാരികൾക്കിടയിൽ ചർച്ചയായിട്ടുണ്ട്.