കണ്ണൂർ: കാലാവസ്ഥാ വ്യതിയാനം ജില്ലയിലെ നെൽകൃഷിക്ക്‌ വിനയാകുന്നു. മെയ്‌ മാസത്തിലെ കനത്ത മഴ ഞാറ്റടി തയ്യാറാക്കൽ പ്രതിസന്ധിയിലാക്കിയെങ്കിൽ ജൂണിൽ മഴയില്ലാത്തത്‌ പ്രശ്‌നമായി. വയലുകളിൽ വെള്ളമില്ലാത്തിനാൽ മൂപ്പെത്തിയ ഞാറ്‌ പറിച്ച്‌ നടാനാവുന്നില്ല. കരവയലുകൾ വരണ്ടിരിക്കുകയാണ്‌. ചില വയലുകളിൽ ജലസേചനം നടത്തി നാട്ടിയെടുക്കുന്നുണ്ടെങ്കിലും കാലവർഷം കനത്തില്ലെങ്കിൽ നെൽകൃഷിയെ പ്രതികൂലമായി ബാധിക്കും.

ന്യൂനമർദത്തെ തുടർന്നുണ്ടായ മഴയിൽ മെയ്‌മാസം ഞാറിടാൻ കർഷകർ ഏറെ പ്രയാസപ്പെട്ടിരുന്നു. മിക്കവരും രണ്ടാംവിളയിലേത്‌ പോലെ ഞാറ്‌ വിതച്ചു. വെള്ളം കൂടിയതിനാൽ താഴ്‌ന്ന വയലുകളിൽ ഞാറിടാൻ പറ്റിയിരുന്നില്ല. അതിനാൽ ഞാറിന്‌ വലിയ ക്ഷാമമാണ്‌ നേരിടുന്നത്‌. ഞാറ്‌ പറിക്കാനും കൂലിച്ചെലവ്‌ കൂടുതലാണ്‌. പറിച്ചെടുക്കുമ്പോൾ പൊട്ടുന്നതിനാൽ പ്രതീക്ഷിച്ച ഞാറ്റടിയും കിട്ടുന്നില്ല. മഴ നിന്നതോടെ മിക്ക പാടശേഖരങ്ങളിലും നാട്ടിപ്പണി നിലച്ചു.

ഞാറ്‌ മൂപ്പെത്തുന്ന സമയത്ത്‌ പറിച്ച്‌ നട്ടില്ലെങ്കിൽ ഉൽപാദനം 40 ശതമാനത്തോളം കുറയാനിടയുണ്ടന്ന്‌ കൃഷി വിദഗ്‌ധൻ മലപ്പട്ടം പ്രഭാകരൻ പറഞ്ഞു. 28 ദിവസത്തിനകം ഞാറ്റടി നടുന്നതാണ്‌ നല്ലത്‌. 40 ദിവസം കഴിഞ്ഞാൽ ഉൽപാദനം തീരെ കുറയും. മുപ്പ്‌ കൂടുന്ന ഞാറിന്‌ പറിച്ചെടുക്കുന്നതിന്‌ ഒരാഴ്‌ച മുമ്പ്‌ അൽപം യൂറിയ വളപ്രയോഗമാവാമെന്നും അദ്ദേഹം വ്യക്തമാക്കി. ജില്ലയിൽ ശരാശരി 3,500 ഹെക്ടറിൽ ഒന്നാംവിള നെൽകൃഷി നടത്തുന്നുണ്ട്‌. കര നെൽകൃഷി ഇക്കുറി കുറവായിരുന്നു. പാടശേഖര സമിതികൾ നേരത്തെ തന്നെ നെൽവിത്ത്‌ നൽകിയിരുന്നു. കൃഷി വകുപ്പ്‌ നൽകുന്ന ആനുകൂല്യങ്ങളും പാടശേഖര സമിതി വഴി വിതരണം ചെയ്‌തിരുന്നു.