കണ്ണൂർ: മൃതദേഹത്തോട്‌ അനാദരവ്‌ കാണിച്ച കണ്ണൂർ കോർപറേഷനെതിരെ സംസ്ഥാന മനുഷ്യാവകാശ കമ്മീഷൻ കേസെടുത്തു. കോവിഡ്‌ ബാധിച്ച്‌ മരിച്ച തിലാനൂരിലെ അമ്പാടിയുടെ മൃതദേഹത്തോടാണ്‌ അനാദരവ്‌ കാട്ടിയത്‌. മാങ്ങാട്ടിടം സ്വദേശിയും ഓൾ ഇന്ത്യാ ലോ സ്‌റ്റുഡന്റ്‌സ്‌ യൂണിയൻ കർണാടക സംസ്ഥാന ജനറൽ സെക്രട്ടറിയുമായ കെ. സിദ്ധാർഥ്‌ ബാബു ദേശീയ മനുഷ്യാവകാശ കമ്മീഷന്‌ നൽകിയ പരാതിയിലാണ്‌ കേസ്‌. സംസ്ഥാന മനുഷ്യാവകാശ കമ്മീഷനോട്‌ അന്വേഷണം നടത്തി കേസെടുക്കാൻ നിർദേശിക്കുകയായിരുന്നു.  

കണ്ണൂർ കോർപറേഷന്റെ പയ്യാമ്പലം ശ്‌മശാനത്തിലെത്തിച്ച അമ്പാടിയുടെ മൃതദേഹം സംസ്‌കരിക്കാൻ തയ്യാറായില്ല. ഹെൽത്ത്‌ ഇൻസ്‌പെക്ടർ വിളിച്ചറിയിച്ചിട്ടും മൃതദേഹം സംസ്‌കരിച്ചില്ല. രാവിലെ കൊണ്ടുവന്ന മൃതദേഹം രണ്ട്‌ മണിക്കൂറിന് ശേഷം കോവിഡ്‌ മാനദണ്ഡപ്രകാരം ഐ.ആർ.പി.സി. വളണ്ടിയർമാരാണ്‌ സംസ്‌കരിച്ചത്‌. കൗൺസിലറുടെ കത്ത്‌ ലഭിച്ചാലേ മരണം രജിസ്‌റ്റർ ചെയ്യൂവെന്ന്‌ ‌ ശ്‌മശാനത്തിന്റെ ചുമതലയുള്ളയാൾ നിർബന്ധം പിടിച്ചു. കൗൺസിലർ നേരിട്ടെത്തി കത്ത്‌ കൊടുത്തിട്ടും മരണം രജിസ്‌റ്റർ ചെയ്യാൻ കൂട്ടാക്കിയില്ല. ബന്ധുക്കൾ ബഹളം വച്ചപ്പോൾ മേയറെ കാണാൻ ആവശ്യപ്പെടുകയായിരുന്നു. മേയർ ടി.ഒ. മോഹനന്റെ നിർദേശ പ്രകാരമാണ്‌ മരണം രജിസ്റ്റർ ചെയ്യാതിരുന്നത്‌.

കോവിഡ്‌ ബാധിച്ച്‌ മരിച്ചയാളുടെ മൃതദേഹത്തോടുള്ള അനാദരവാണിതെന്ന്‌ ആക്ഷേപമുയർന്നു. മേയറുടെ രഷ്‌ട്രീയക്കളിക്കെതിരെ വ്യാപക പ്രതിഷേധവുമുണ്ടായി. ഐ.ആർ.പി.സി. വളണ്ടിയർമാർ കോവിഡ്‌ മാനദണ്ഡപ്രകാരം മൃതദേഹം സംസ്‌കരിച്ചത്‌ മേയർ രാഷ്‌ട്രീയവൽക്ക‌രിക്കുകയായിരുന്നു. പയ്യാമ്പലത്ത്‌ മാത്രം ഐ.ആർ.പി.സി. 250ലേറെ മൃതദേഹം കോവിഡ്‌ മാനദണ്ഡപ്രകാരം സംസ്‌കരിച്ചിട്ടുണ്ട്‌.