പയ്യന്നൂർ: ഫയർ ആൻഡ് റെസ്ക്യൂ സർവീസ് സംസ്ഥാനത്ത് ഏകീകൃത സ്വഭാവത്തോടെ ദുരന്ത നിവാരണ സർവേ നടത്തുന്നു. പയ്യന്നൂർ സ്റ്റേഷൻ പരിധിയിൽ സിവിൽ ഡിഫൻസ് വളന്റിയർമാരെ ഉൾപ്പെടുത്തി നടത്തിയ സർവേ മാതൃകയാക്കിയാണ് സംസ്ഥാനത്തെ 124 ഫയർ സ്റ്റേഷനുകളിലും സർവേ നടത്താൻ ഫയർ ആൻഡ് റെസ്ക്യൂ സർവീസസ് ഡയറക്ടർ ജനറൽ ഡോ.ബി.സന്ധ്യ ഉത്തരവിട്ടത്.

അപകടാവസ്ഥയിലായ വൈദ്യുതി തൂണും, വലിയ മരങ്ങളും, കൈവരിയില്ലാത്ത പാലങ്ങളും, ആൾമറയില്ലാത്ത കിണറുകളും, കുളങ്ങളും, അപകട സാധ്യതയുള്ള കെട്ടിടങ്ങളും, കടലാക്രമണത്തിൽ കൂടുതൽ അപകടങ്ങൾ ഉണ്ടാകുന്ന പ്രദേശങ്ങളും, വെള്ളക്കെട്ടുകളും, വെള്ളപ്പൊക്ക ദുരന്ത സാധ്യത പ്രദേശങ്ങളുമൊക്കെ കണ്ടെത്തി രേഖപ്പെടുത്തുകയാണ് സർവേയിലൂടെ ചെയ്യുന്നത്. പയ്യന്നൂരിൽ ഒരു മാസം മുൻപ് ആരംഭിച്ച സർവേ അന്തിമ ഘട്ടത്തിലാണ്.

ഇത് മനസ്സിലാക്കിയാണ് മുഴുവൻ ഓഫിസുകളിലും സർവേ നടത്താൻ നിർദേശമുണ്ടായത്. സർവേ ഫലങ്ങൾ രേഖപ്പെടുത്തി ഓരോ സ്റ്റേഷനിലും മാപ്പ് തയാറാക്കി വയ്ക്കും. സർവേ ഫലം ജില്ലാ കലക്ടർക്കും ബന്ധപ്പെട്ട വകുപ്പുകൾക്കും നൽകും. ബീറ്റ് ഫയർ ഓഫിസർമാരെ ദുരന്ത നിവാരണ പ്രവർത്തനങ്ങളുടെ ഏകോപനത്തിന് നിയോഗിക്കുകയും സിവിൽ ഡിഫൻസ് വളന്റിയർമാർ തുടർന്ന് പ്രവർത്തനം നടത്തുകയും ചെയ്യും.

സർവേ ഫലങ്ങൾ ക്രോഡീകരിച്ച് റിപ്പോർട്ട് തയാറാക്കാൻ ഫയർ ആൻഡ് റെസ്ക്യൂ സർവീസസ് അക്കാദമി ഡയറക്ടറെ ചുമതലപ്പെടുത്തിയിട്ടുണ്ട്. വെള്ളം, കടൽ തുടങ്ങിയവയുമായി ബന്ധപ്പെട്ട രേഖകൾ ക്രോഡീകരിക്കാൻ വാട്ടർ റെസ്ക്യൂ ഡയറക്ടറെ ചുമതലപ്പെടുത്തി. ഓരോ ജില്ലയിലെയും ജലാശയ അപകട സാധ്യതയുള്ള പ്രദേശങ്ങളുടെ ഡിജിറ്റൽ മാപ്പ് തയാറാക്കി വാട്ടർ റെസ്ക്യൂ അക്കാദമിയിലും സംസ്ഥാന തലത്തിലുള്ള എല്ലാ ദുരന്ത നിവാരണ സാധ്യതയുള്ള പ്രദേശങ്ങളുടെയും ഡിജിറ്റൽ മാപ്പ് തയാറാക്കി ഫയർ ആൻഡ് റെസ്ക്യൂ സർവീസസ് അക്കാദമിയിലും സൂക്ഷിക്കും.